កាលពីល្ងាចថ្ងៃចន្ទ (ទី២៧ ខែតុលា) Lukoil ដែលជាក្រុមហ៊ុនប្រេងលំដាប់យក្សរបស់រុស្ស៊ី បានឲ្យដឹងថា ខ្លួននឹងលក់ទ្រព្យសម្បត្តិនៅក្រៅប្រទេស បន្ទាប់ពីទទួលរងទណ្ឌកម្មពីសហរដ្ឋអាមេរិក ដោយសារសង្គ្រាម នៅអ៊ុយក្រែន។

ប្រធានាធិបតីអាមេរិក លោក Donald Trump កាលពីសប្តាហ៍មុន បានដាក់ចេញកញ្ចប់ទណ្ឌកម្មដ៏សំខាន់ដំបូងរបស់លោក ចំពោះរុស្ស៊ី ដោយផ្តោតលើក្រុមហ៊ុនប្រេងធំជាងចំនួន ២ គឺ Lukoil និង Rosneft បន្ទាប់ពីបានលើកឡើងថា លោកមានការខកចិត្តដែលទីក្រុងមូស្គូមិនព្រមបញ្ឈប់ការវាយលុករបស់ខ្លួន។

ក្រុមហ៊ុន Lukoil បានបញ្ជាក់នៅក្នុងសេចក្តីថ្លែងការណ៍មួយថា៖ «ដោយសារមានការដាក់ចេញនូវវិធានការរឹតបន្តឹងលើក្រុមហ៊ុន និងក្រុមហ៊ុនបុត្រសម្ព័ន្ធរបស់ខ្លួន ពីសំណាក់រដ្ឋមួយចំនួន ក្រុមហ៊ុនបានប្រកាសពីចេតនា ក្នុងការលក់ទ្រព្យសម្បត្តិអន្តរជាតិរបស់ខ្លួន»។ សេចក្ដីថ្លែងការណ៍នោះ បានបន្ថែមថា ដំណើរការដេញថ្លៃបានចាប់ផ្តើមរួចហើយ។

បន្ទាប់ពីមានជំនួបការទូតភា្លមៗបន្តបន្ទាប់ជាច្រើន នៅឆ្នាំនេះ និងការចរចាដោយផ្ទាល់លើកដំបូង រវាងរុស្ស៊ី និងអ៊ុយក្រែន ក្នុងរយៈពេលជាង ៣ឆ្នាំ កិច្ចប្រឹងប្រែង ដើម្បីបញ្ចប់សង្រ្គាម បានជាប់គាំង ដោយសញ្ញានៃការមានវឌ្ឍនភាព គឺតិចតួចណាស់។

គួរបញ្ជាក់ថា ការដាក់ទណ្ឌកម្មនេះ នឹងបង្កកទ្រព្យសម្បត្តិរបស់ក្រុមហ៊ុន Rosneft និង Lukoil ទាំងអស់ នៅក្នុងសហរដ្ឋអាមេរិក និងហាមឃាត់ក្រុមហ៊ុនអាមេរិកមិនឲ្យធ្វើអាជីវកម្មជាមួយក្រុមហ៊ុនទាំង ២ នេះ។ ក្រុមហ៊ុនទាំង២ ដែលមានចំនួន ៥៥ភាគរយនៃទិន្នផលប្រេងរបស់រុស្ស៊ី ក៏ត្រូវបានដាក់ក្នុងបញ្ជី SDN នៃអង្គភាពដាក់ទណ្ឌកម្ម ជាបញ្ជីឈ្មោះដែលត្រូវបានតាមមើលដោយប្រទេសជាច្រើន និងបង្កក្ដីបារម្ភនៅក្នុងពិភពជំនួញ។

ទីក្រុងវ៉ាស៊ីនតោនបានផ្តល់ឲ្យក្រុមហ៊ុនដែលធ្វើការជាមួយអង្គភាពរបស់រុស្ស៊ី នូវរយៈពេលមួយខែ ដើម្បីកាត់ផ្តាច់ទំនាក់ទំនង ឬបើមិនដូច្នេះទេ ត្រូវប្រឈមនឹងការដាក់ទណ្ឌកម្មបន្ថែម ដែលនឹងរារាំងក្រុមហ៊ុនមិនឲ្យមានទំនាក់ទំនងជាមួយធនាគារអាមេរិក អាជីវករ សេវាដឹកជញ្ជូន និងក្រុមហ៊ុនធានារ៉ាប់រង៕