នាយករដ្ឋមន្ត្រីហុងគ្រី លោក Viktor Orban នឹងជួបជាមួយលោកប្រធានាធិបតី Donald Trump ដែលជាសម្ព័ន្ធមិត្តរបស់លោក នៅសប្តាហ៍ក្រោយ ដើម្បីពិភាក្សាអំពីការដាក់ទណ្ឌកម្មរបស់សហរដ្ឋអាមេរិកលើថាមពលរុស្ស៊ី ដែលទីក្រុង Budapest ពឹងផ្អែកយ៉ាងខ្លាំង។

កាលពីសប្តាហ៍មុន សហរដ្ឋអាមេរិកបានផ្ដល់ផលប៉ះពាល់យ៉ាងធ្ងន់ធ្ងរដល់កក្រុមផលិតប្រេងធំជាងគេចំនួន ២ របស់រុស្ស៊ី គឺ Rosneft និង Lukoil ជាមួយនឹងការដាក់ទណ្ឌកម្ម ជាវិធានការដំបូងគេដែលផ្តោតលើទីក្រុងមូស្គូ ចាប់តាំងពីលោក Trump ត្រលប់មកកាន់តំណែងវិញ។

ហុងគ្រី ដែលត្រូវបានគេមើលឃើញថា ជាសម្ព័ន្ធមិត្តជិតស្និទ្ធបំផុតនៅក្នុងសហភាពអឺរ៉ុប ទាំងជាមួយលោក Trump និងវិមានក្រឹមឡាំង នៅតែពឹងផ្អែកយ៉ាងខ្លាំង លើប្រេង និងឧស្ម័នរបស់រុស្ស៊ី ទោះបីជារុស្ស៊ីឈ្លានពានអ៊ុយក្រែនក៏ដោយ។

នៅក្នុងបទសម្ភាសន៍ជាមួយសារព័ត៌មានអ៊ីតាលី La Repubblica ក្នុងអំឡុងពេលដំណើរទស្សនកិច្ចទៅកាន់ទីក្រុងរ៉ូម លោក Orban ត្រូវបានសួរថា តើលោក Trump បង្កើតនូវកំហុសដែរ ឬទេ ហើយលោកនាយករដ្ឋមន្ត្រីហុងគ្រី ត្រូវបានដកស្រង់សម្តី ដែលបាននិយាយថា៖ «តាមទស្សនៈរបស់ហុងគ្រី គឺមែនហើយ។ ដូច្នេះហើយ យើងនឹងព្យាយាមរកផ្លូវចេញ»។

លោកបានបន្ថែមថា៖ «ខ្ញុំនឹងទៅក្រុងវ៉ាស៊ីនតោនឆាប់ៗនេះ ដើម្បីពិភាក្សារឿងនេះជាមួយលោកប្រធានាធិបតី Trump។ យើងកំពុងពិភាក្សាអំពីរបៀបបង្កើតប្រព័ន្ធនិរន្តរភាព សម្រាប់សេដ្ឋកិច្ចរបស់ប្រទេសរបស់ខ្ញុំ ពីព្រោះហុងគ្រីពឹងផ្អែកខ្លាំងលើប្រេង និងឧស្ម័នរបស់រុស្ស៊ី»៕