ប្រធានាធិបតីអ៊ុយក្រែន លោក Volodymyr Zelenskyy បាននិយាយថា របស់លោកបានត្រៀមខ្លួនរួចជាស្រេចហើយ ដើម្បីបើកកិច្ចចរចាសន្តិភាព ប៉ុន្តែនឹងមិនដកកងទ័ពរបស់ខ្លួនចេញពីដែនដីបន្ថែមជាមុន ដូចដែលទីក្រុងមូស្គូបានទាមទារនោះឡើយ។

ក្នុងអំឡុងពេលធ្វើការអត្ថាធិប្បាយទៅកាន់ក្រុមអ្នកសារព័ត៌មាន ដែលត្រូវបានចេញផ្សាយ នៅថ្ងៃអង្គារ (ទី២៨ ខែតុលា) នេះ លោកបានបញ្ជាក់ថា លោកមានក្ដីរីករាយ ក្នុងការបើកកិច្ចពិភាក្សាដែលត្រូវបានរៀបចំឡើងនៅកន្លែងណាក៏បាន លើកលែងតែនៅប្រទេសរុស្ស៊ីផ្ទាល់ ឬនៅដែនដីនៃសម្ព័ន្ធមិត្តជិតស្និទ្ធរបស់ប្រទេសនេះ គឺបេឡារុស។

ផែនការ សម្រាប់កិច្ចប្រជុំកំពូល នៅទីក្រុង Budapest ប្រទេសហុងគ្រី ក្នុងខែនេះ រវាងប្រធានាធិបតីអាមេរិក លោក Donald Trump និងលោក Vladimir Putin របស់រុស្ស៊ី ត្រូវបានផ្អាក បន្ទាប់ពីទីក្រុងមូស្គូបានមិនផ្លាស់ប្ដូរការទាមទារ ដែលមានរួមទាំងការឲ្យអ៊ុយក្រែនប្រគល់ដែនដីបន្ថែមទៀត ជាលក្ខខណ្ឌ សម្រាប់បទឈប់បាញ់។ លោក Trump បានគាំទ្រការអំពាវនាវរបស់អ៊ុយក្រែន ដើម្បីឲ្យមានបទឈប់បាញ់ភ្លាមៗ ត្រឹមសមរភូមិជួរមុខបច្ចុប្បន្ន។

លោក Zelenskyy បាននិយាយថា៖ «វាគឺច្បាស់ណាស់ថា យើងកំពុងខិតទៅរកការទូត តែពីទីតាំងដែលយើងឈរជើងនាពេលបច្ចុប្បន្ន។ យើងនឹងមិនមានការដកថយណាមួយឡើយ ហើយនឹងមិនបោះបង់ផ្នែកណាមួយនៃរដ្ឋរបស់យើង ឬកន្លែងផ្សេងទៀត។ ហើយលទ្ធផលសំខាន់នោះ គឺថា នៅទីបំផុត ភាគីអាមេរិក បានផ្ដល់សញ្ញាជាសាធារណៈថា លោកប្រធានាធិបតី Trump បានចេញសារបែបនេះ»។

លោក Zelenskyy បានបន្តទៀតថា លោករីករាយក្នុងការចូលរួមកិច្ចពិភាក្សា ក្នុងនោះរួមទាំងនៅក្នុងប្រទេសហុងគ្រីផងដែរ បើទោះបីជាមានក្ដីបារម្ភ អំពីគោលជំហរមួយចំនួនរបស់នាយករដ្ឋមន្រ្តីរបស់ប្រទេសនេះ គឺលោក Viktor Orban ដែលលោកបាននិយាយថា «រារាំងអ្វីៗគ្រប់យ៉ាង ដែលផ្ដល់ឲ្យអ៊ុយក្រែន»។

លោកបានសង្កត់ធ្ងន់ថា៖ «ប្រសិនបើអាចបាន ពោលគឺព្រះអម្ចាស់ប្រទានពរ សូមឲ្យការចរចាប្រព្រឹត្តទៅនៅកន្លែងណាក៏បាន។ ពិតមែនហើយ វាសឹងតែមិនមានបញ្ហាអ្វីទាំងអស់ ដោយគ្រាន់តែមិនមែននៅក្នុងប្រទេសរុស្ស៊ី ហើយពិតណាស់មិនមែននៅប្រទេសបេឡារុស»៕