ក្រុមហ៊ុនអាកាសចរណ៍ បានឲ្យដឹងថា យន្តហោះធុនតូចមួយគ្រឿង ដែលហោះហើរពីឆ្នេរប្រទេសកេនយ៉ា បានធ្លាក់នៅថ្ងៃអង្គារ (ទី២៨ ខែតុលា) នេះ ដោយបានបណ្ដាលឲ្យមនុស្សទាំង ១១នាក់នៅលើយន្តហោះនោះបាត់បង់ជីវិត ក្នុងនោះរួមមានទាំងជនបរទេសផងដែរ។

យន្តហោះធុនតូចនេះ កំពុងស្ថិតនៅផ្លូវហោះទៅកាន់ Kichwa Tembo ជាអាកាសយានដ្ឋានទំហំតូចដែលមានទីតាំងនៅឧទ្យានជាតិ Maasai Mara ដោយបានចាកចេញពីកន្លែងទេសចរណ៍ដ៏ទាក់ទាញ Diani នៅពេលដែលវាបានធ្លាក់នៅវេលាម៉ោងប្រហែល ៥:៣០នាទីព្រឹក ម៉ោងក្នុងស្រុក (ត្រូវនឹងម៉ោង ២:៣០នាទី ម៉ោងកសល)។

ប្រធានក្រុមហ៊ុនអាកាសចរណ៍ Mombasa Air Safari លោក John Cleave បានបញ្ជាក់ពីការកើតមានឧបទ្ទវហេតុនេះ ហើយបាននិយាយថា មានអ្នកដំណើរ ១០នាក់ ហុងគ្រី ៨នាក់ អាល្លឺម៉ង់ ២នាក់ និងអ្នកបើកយន្តហោះជនជាតិកេនយ៉ាម្នាក់។

លោកបានឲ្យដឹងនៅក្នុងសេចក្តីថ្លែងការណ៍មួយថា «ជារឿងគួរឲ្យសោកស្តាយណាស់ មិនមានអ្នកនៅរស់រានមានជីវិតនោះឡើយ» ដោយលោកបានបន្ថែមថា ក្រុមហ៊ុនបាន «បានចាប់ផ្ដើមប្រតិបត្តិការក្រុមឆ្លើយតបបន្ទាន់របស់យើង» និងកំពុងសហការជាមួយអាជ្ញាធរមូលដ្ឋាន។

សេចក្តីថ្លែងការណ៍បានបន្ថែមថា៖ «យើងសូមចូលរួមរំលែកទុក្ខជាមួយអ្នកទាំងអស់ដែលរងប៉ះពាល់ដោយហេតុកាណ៍សោកនាដកម្មនេះ»។

មុននេះ សេចក្តីថ្លែងការណ៍ពីអាជ្ញាធរអាកាសចរណ៍ស៊ីវិលកេនយ៉ា (KCAA) បានឲ្យដឹងថា យន្តហោះនេះបានដឹកមនុស្ស ១២នាក់ នៅពេលធ្លាក់៕