ប្រទេសហ្វាំងឡង់បានស្វាគមន៍ ចំពោះទណ្ឌកម្មចុងក្រោយបង្អស់ដែលដាក់ដោយសហរដ្ឋអាមេរិក និងសហភាពអឺរ៉ុប (EU) លើវិស័យថាមពលរបស់រុស្ស៊ី ប៉ុន្តែបានបញ្ជាក់ថា វិធានការខ្លាំងជាងនេះ នៅតែត្រូវការជាចាំបាច់ ដើម្បីបង្ខំឲ្យទីក្រុងមូស្គូបញ្ចប់សង្រ្គាមរបស់ខ្លួន នៅអ៊ុយក្រែន។

ដោយនិយាយទៅកាន់ប្រព័ន្ធផ្សព្វផ្សាយ CNA នាថ្ងៃអង្គារ (ទី២៨ ខែតុលា) នេះ ក្នុងអំឡុងពេលមានដំណើរទស្សនកិច្ចរបស់លោកស្រី នៅប្រទេសសិង្ហបុរី រដ្ឋមន្ត្រីការបរទេសហ្វាំងឡង់ លោកស្រី Elina Valtonen បាននិយាយថា សម្ពាធសេដ្ឋកិច្ចនៅតែជាឧបករណ៍ដ៏មានប្រសិទ្ធភាពបំផុតមួយ ដើម្បីធ្វើឲ្យម៉ាស៊ីនសង្រ្គាមរបស់រុស្ស៊ីចុះខ្សោយ។

លោកស្រី បានលើកឡើងថា៖ «យើងត្រូវធ្វើឲ្យសេដ្ឋកិច្ច (រុស្ស៊ី) ចុះខ្សោយ ដើម្បីបង្ខំឲ្យរុស្ស៊ីចូលទៅកាន់តុចរចា ខណៈមិនត្រឹមតែរឿងនេះប៉ុណ្ណោះទេ ប៉ុន្តែថែមទាំងត្រូវយល់ព្រមយ៉ាងពិតប្រាកដលើកិច្ចព្រមព្រៀងសន្តិភាពយូរអង្វែង ហើយនោះក៏ជាការផ្ដល់យុត្តិធម៌ និងគោរពតាមធម្មនុញ្ញអង្គការសហប្រជាជាតិផងដែរ»។

លោកស្រី Valtonen បានបន្ថែមថា៖ «យើងឃើញថា (ទណ្ឌកម្ម) ដែលកំពុងដំណើរការរួចហើយ ចំណាត់ការទាំងនោះ កំពុងធ្វើឲ្យសេដ្ឋកិច្ចរុស្ស៊ីធ្លាក់ចុះ។ ដូច្នេះ ទណ្ឌកម្ម ត្រូវមានច្រើនឡើងៗបន្ថែមទៀត យើងត្រូវរង់ចាំលទ្ធផលប្រកបដោយភាពអត់ធ្មត់»។

គួរបញ្ជាក់ថា កាលពីសប្តាហ៍មុន សហរដ្ឋអាមេរិកបានប្រកាសដាក់ទណ្ឌកម្មថ្មី លើក្រុមហ៊ុនប្រេងធំបំផុតចំនួន ២ របស់រុស្ស៊ី គឺ Rosneft និង Lukoil ដែលជាការផ្លាស់ប្តូរគោលនយោបាយដ៏សំខាន់មួយ។ ចំណែកបណ្ដារដ្ឋជាសមាជិក EU ក៏បានអនុម័តកញ្ចប់វិធានការទី១៩ របស់ខ្លួនផងដែរ ដែលរួមមានទាំងការហាមឃាត់លើការនាំចូលឧស្ម័នធម្មជាតិរាវ (LNG) របស់រុស្ស៊ី៕