បាតុកម្មប្រឆាំងការប្រព្រឹត្តខុសរបស់អ៊ីស្រាអែលលើជនប៉ាឡេស្ទីន កាន់តែខ្លាំងក្លា និងកាន់តែមានទ្រង់ទ្រាយធំជាងមុន ។ ពេលមើលឃើញអ៊ីស្រាអែលប្រព្រឹត្តអំពើប្រល័យពូជសាសន៍នៅតំបន់ហ្កាហ្សា ការធ្វើពហិការសកលបានកើនឡើង ប្រឆាំងនឹងអ៊ីស្រាអែល ។

ការតវ៉ាតាមបរិវេនសាកលវិទ្យាល័យ និងការបោះជំរំនៅសហរដ្ឋអាមេរិក និងកាណាដា បាននាំឲ្យស្ថាប័នអប់រំធំៗ កាត់ផ្តាច់ទំនាក់ទំនងជាមួយសមភាគីអ៊ីស្រាអែល ខណៈការវិនិយោគនៅអ៊ីស្រាអែល ក៏បានធ្លាក់ចុះ ហើយប្រទេសមហាអំណាចសេដ្ឋកិច្ចធំៗបំផុតរបស់ពិភពលោក បានទទួលស្គាល់រដ្ឋប៉ាឡេស្ទីន ។

លោក Mohammed Mustafa គឺជាវេជ្ជបណ្ឌិតកាត់សាសន៍ប៉ាឡេស្ទីន-អូស្រា្តលីម្នាក់ដែលឪពុកម្តាយរបស់លោកបានចាកចេញពីទីក្រុងកំណើត Deir el-Balah ស្ថិតនៅកណ្តាលតំបន់ហ្កាហ្សា កាលពីរយៈពេលច្រើនទសវត្សរ៍មុន ដើម្បីស្វែងរកជីវិតល្អប្រសើរជាងនេះ ។

លោកបានស្ម័គ្រចិត្តធ្វើការនៅតាមមន្ទីរពេទ្យក្នុងតំបន់ហ្កាហ្សានារយៈពេល ២ឆ្នាំកន្លងមកនេះ ហើយលោកបានចែករំលែកបទពិសោធន៍នៅលើបណ្តាញព័ត៌មានសង្គម រួមទាំងដំណើរទស្សនកិច្ចរបស់លោកទៅកាន់តំបន់ហ្កាហ្សា ចូលរួមសន្និសីត និងគាំទ្រជនប៉ាឡេស្ទីន ។

លោកនិយាយថា បទពិសោធន៍មើលការផ្សាយពីអំពើប្រល័យពូជសាសន៍ បានធ្វើឲ្យមនុស្សជាច្រើនផ្លាស់ប្តូរ ។ រយៈពេលច្រើនឆ្នាំហើយដែលជនប៉ាឡេស្ទីនយល់ឃើញថា គ្មាននរណាម្នាក់ស្តាប់ពួកគេឡើយ ។ ឥឡូវយើងឃើញមនុស្សនៅទូទាំងទ្វីបជាច្រើន នាំគ្នាដង្ហែរក្បួនតវ៉ា បង្កើតជារូបសិល្បះ និងទាមទាររកយុត្តិធម៌ វានឹងផ្តល់ក្តីសង្ឃឹមដល់អ្នកថា មនសិការបស់ពិភពលោកនៅទីបញ្ចប់បានភ្ញាក់ឡើងហើយ ។

លោកបន្តថា កាលលោកនៅក្មេង លោកពុំធ្លាប់ដែលឃើញសាមគ្គីភាពសកលបែបនេះឡើយ វាហាក់ដូចជាការពិតត្រូវបានលាតត្រដាង ៕