អ៊ីស្រាអែលបានបើកការវាយប្រហារតាមអាកាសនៅតំបន់ហ្កាហ្សា ជាការឆ្លើយតបនឹងអ្វីដែលក្រុមមន្ត្រីអ៊ីស្រាអែលនិយាយថាជាការរំលោភលើកិច្ចព្រមព្រៀងឈប់បាញ់សម្របសម្រួលដោយអាមេរិក។

រដ្ឋមន្ត្រីការពារជាតិអ៊ីស្រាអែលលោក Israel Katz បានចោទប្រកាន់ក្រុមហាម៉ាស ថាបានវាយប្រហារទាហានអ៊ីស្រាអែលនៅតំបន់ហ្កាហ្សាកាលពីថ្ងៃអង្គារសប្ដាហ៍នេះ ហើយបានបំពានលើលក្ខខណ្ឌនៃការប្រគល់សាកសពចំណាប់ខ្មាំងទៅត្រឡប់មកវិញ។

ក្រុមប្រដាប់អាវុធប៉ាឡេស្ទីន បានអះអាងថា ខ្លួនមិនជាប់ពាក់ព័ន្ធទៅនឹងការវាយប្រហារនេះទេ ហើយបានទទូចថាខ្លួនបានប្តេជ្ញាចិត្តចំពោះកិច្ចព្រមព្រៀងបទឈប់បាញ់។     

យ៉ាងហោចណាស់មានជនជាតិប៉ាឡេស្ទីនចំនួន ៣៣ នាក់ត្រូវបានសម្លាប់នៅក្នុងការវាយប្រហារជាបន្តបន្ទាប់របស់អ៊ីស្រាអែល នេះបើយោងតាមទីភ្នាក់ងារការពារជនស៊ីវិលគ្រប់គ្រងដោយក្រុមហាម៉ាស និងមន្ត្រីមន្ទីរពេទ្យរបស់ហ្កាហ្សា។ ការវាយប្រហារនានាបានប៉ះលើរលំនៅឋាន សាលារៀន និងប្លុកលំនៅឋាននៅក្នុងទីក្រុង Gaza, Beit Lahia, al-Bureij, Nuseirat និងទីក្រុង Khan Younis ។    

ទោះមានការវាយប្រហារកើនឡើងក៏ដោយ ក៏អនុប្រធានាធិបតីអាមេរិក លោក JD Vance បាននិយាយថា លោកជឿថា បទឈប់បាញ់កំពុងត្រូវបានបន្តជាធរមានដែរ ។

សេចក្តីថ្លែងការណ៍ខ្លីមួយ ដែលចេញផ្សាយដោយការិយាល័យរបស់នាយករដ្ឋមន្ត្រីអ៊ីស្រាអែល លោក Benjamin Netanyahu កាលពីល្ងាចថ្ងៃអង្គារ បាននិយាយថា លោកបានបញ្ជាឱ្យមានការវាយប្រហារដោយបង្ខំ ដោយយោធា ប៉ុន្តែពុំបានបញ្ជាក់ពីហេតុផលរបស់លោកនោះទេ៕