មនុស្សយ៉ាងហោចណាស់៦៤នាក់បានស្លាប់កាលពីថ្ងៃអង្គារ ទី២៨ ខែតុលា ក្នុងប្រតិបត្តិការរបស់នគរបាលដ៍ខ្លាំងក្លាបំផុតមិនធ្លាប់មាននៅទីក្រុង Rio de Janeiro ប្រទេសប្រេស៊ីល ដែលបានកំណត់គោលដៅលើក្រុមជនអន្ធពាលប៉ុន្មានថ្ងៃមុនពេលទីក្រុងនេះរៀបចំព្រឹត្តិការណ៍សកលទាក់ទងនឹងកិច្ចប្រជុំកំពូលអាកាសធាតុរបស់អង្គការសហប្រជាជាតិដែលគេស្គាល់ថា COP30 ។

ជារឿយៗនគរបាលបានធ្វើប្រតិបត្តិការទ្រង់ទ្រាយធំប្រឆាំងក្រុមឧក្រិដ្ឋជន មុនពេលព្រឹត្តិការណ៍សំខាន់ៗនៅក្នុងទីក្រុង Rio ដែលទទួលធ្វើជាម្ចាស់ផ្ទះកីឡាអូឡាំពិកកាលពីឆ្នាំ២០១៦ កិច្ចប្រជុំកំពូលG20 ឆ្នាំ ២០២៤ និងកិច្ចប្រជុំកំពូល BRICS កាលពីខែកក្កដា។

នៅសប្តាហ៍ក្រោយ ទីក្រុង Rio នឹងធ្វើជាម្ចាស់ផ្ទះកិច្ចប្រជុំកំពូលអភិបាលក្រុងសកល C40 ដោះស្រាយបញ្ហាបម្រែបម្រួលអាកាសធាតុ និងរង្វាន់ Earthshot របស់ព្រះអង្គម្ចាស់ William ដែលនឹងមានវត្តមានអ្នកល្បីៗរួមមានទាំងតារាប៉ុប Kylie Minogue និងម្ចាស់ជើងឯកពិភពលោក Formula One បួនសម័យកាល លោក Sebastian Vettel ។

កម្មវិធីនេះគឺជាផ្នែកមួយនៃដំណើរការរហូតដល់កិច្ចប្រជុំ COP30 ជាកិច្ចប្រជុំកំពូលអាកាសធាតុរបស់អង្គការសហប្រជាជាតិដែលនឹងធ្វើឡើងនៅទីក្រុង Belem តំបន់Amazon ចាប់ពីថ្ងៃទី១០ ខែវិច្ឆិកា ដល់ថ្ងៃទី ២១ ខែវិច្ឆិកា។