រដ្ឋមន្ត្រីការពារជាតិអាមេរិក លោក Pete Hegseth បាននិយាយកាលពីថ្ងៃអង្គារ (២៨ តុលា) ថា ការវាយប្រហារជាបន្តបន្ទាប់របស់សហរដ្ឋអាមេរិក ប្រឆាំងនឹងនាវាដែលសង្ស័យថាដឹកគ្រឿងញៀននៅតំបន់ប៉ាស៊ីហ្វិកភាគខាងកើត បានសម្លាប់ជនសង្ស័យជួញដូរគ្រឿងញៀនចំនួន ១៤នាក់ និងបន្សល់ទុកអ្នករួចជីវិតម្នាក់ នៅក្នុងប្រតិបត្តិការចុងក្រោយបង្អស់នៃយុទ្ធនាការប្រឆាំងគ្រឿងញៀនរបស់លោកប្រធានាធិបតី Donald Trump ។

ការវាយប្រហារនៅប៉ាស៊ីហ្វិកនេះកើតឡើងស្របពេលការបង្កើនយោធារបស់សហរដ្ឋអាមេរិក នៅតំបន់ការ៉ាអ៊ីប ដែលរួមមាននាវាពិឃាតផ្ទុកមីស៊ីលប្រើប្រព័ន្ធទូរបញ្ជា យន្តហោះចម្បាំង F-35 នាវាមុជទឹកនុយក្លេអ៊ែរ និងកងទ័ពរាប់ពាន់នាក់។ រដ្ឋបាលអាមេរិកក៏បានបញ្ជាឱ្យក្រុមវាយប្រហារទៅកាន់តំបន់នេះផងដែរ ហើយត្រូវរំពឹងថានឹងទៅដល់សមុទ្រការ៉ាអ៊ីប ក្នុងប៉ុន្មានសប្តាហ៍ខាងមុខ។

ក្នុងសារបង្ហោះប្រព័ន្ធផ្សព្វផ្សាយសង្គម លោក Hegseth បាននិយាយថា អាជ្ញាធរម៉ិកស៊ិក បានគ្រប់គ្រងប្រតិបត្តិការស្វែងរក និងសង្គ្រោះអ្នករួចនជីវិតម្នាក់ ពីការវាយប្រហារទាំង ៣លើក ដែលធ្វើឡើងកាលពីថ្ងៃចន្ទកន្លងទៅ។ លោក Hegseth បន្តថា៖ «នាវាទាំង ៤គ្រឿងនោះ ត្រូវប្រព័ន្ធស៊ើបការណ៍សម្ងាត់របស់អាមេរិកតាមដានដឹងថា កំពុងនៅតាមផ្លូវជួញដូរគ្រឿងញៀន និងកំពុងដឹកគ្រឿងញៀន»៕

លោក Hegseth ក៏បានបង្ហោះវីដេអូប្រហែល ៣០វិនាទី ដែលហាក់ដូចជាបង្ហាញឱ្យឃើញនាវាពីរគ្រឿងនៅជិតគ្នាក្នុងដែនទឹក រួចក៏មានការផ្ទុះកើតឡើត ចំណែកផ្នែកមួយទៀតនៃវីដេអូ បានបង្ហាញឱ្យឃើញនាវាមួយគ្រឿងដែលធ្វើចលនាក្នុងដែនទឹក មុនពេលផ្ទុះ៕