ការបោះឆ្នោតជាតិរបស់ប្រទេសហូឡង់ កំពុងប្រព្រឹត្តិទៅនៅថ្ងៃពុធ (២៩ តុលា) នេះ ជាមួយនឹងជម្រើសដ៏លំបាកមួយ ថាតើត្រូវរើសបេក្ខភាពបក្សជាតិនិយមប្រឆាំងនឹងអន្តោប្រវេសន៍ គឺអ្នកនយោបាយប្រជានិយម លោក Geert Wilders ដែលបានទម្លាក់ក្រុមចម្រុះអភិរក្សនិយមក្រោយភាពប្រេះស្រាំអស់ពីរឆ្នាំ ឬក៏ត្រូវសម្រេចចិត្តវិលទៅរកក្រុមកណ្ដាលនិយមវិញ។

ខណៈដែលបក្សជាតិនិយមកំពុងនាំមុខក្នុងការស្ទង់មតិនានាទាំងនៅចក្រភពអង់គ្លេស បារាំង និងអាល្លឺម៉ង់ — ការបោះឆ្នោតនៅហូឡង់នេះគឺជាការសាកល្បងថា តើលទ្ធិប្រជានិយមអាចពង្រីកវិសាលភាពរបស់ខ្លួនថែមទៀតឬទេ ឬក៏បានឈានដល់កម្រិតកំពូលរួចទៅហើយក្នុងផ្នែកខ្លះនៃទ្វីបអឺរ៉ុប។

ការិយាល័យបោះឆ្នោតបើកនៅដើមម៉ោងក្នុងស្រុក ៦:៣០នាទីព្រឹក តាមទីតាំងមួយចំនួន ដើម្បីបង្កភាពងាយស្រួលដល់ម្ចាស់ឆ្នោត និងបិទនៅម៉ោង ៩យប់។ ការស្ទង់មតិក្រោយបោះឆ្នោត — ដែលកន្លងមកតែងបង្ហាញលទ្ធផលត្រឹមត្រូវជានិច្ច— នឹងត្រូវចេញផ្សាយនៅពេលបិទការបោះឆ្នោត។

ទើបតែពីរឆ្នាំមុន លោក Wilders បានដឹកនាំបក្សរបស់លោកឱ្យឈរនៅលេខរៀងទី១ ដ៏គួរឱ្យភ្ញាក់ផ្អើលក្នុងការបោះឆ្នោតឆ្នាំ២០២៣ ហើយបានបង្កើតក្រុមចម្រុះអភិរក្សនិយម ប៉ុន្តែដៃគូរបស់លោកបដិសេធមិនគាំទ្រលោកឱ្យឡើងធ្វើជានាយករដ្ឋមន្ត្រីឡើយ។ ដោយហេតុនេះ លោកក៏បានទម្លាក់ក្រុមចម្រុះកាលពីខែមិថុនាកន្លងទៅ បូករួមនឹងភាពប្រេះឆាលើការអនុម័តវិធានការប្រឆាំងជនភៀសខ្លួន។

ការស្ទង់មតិបង្ហាញថា គណបក្សសេរីភាព (PVV) របស់លោក Wilders បាននាំមុខស្ដួចស្ដើង តាមពីក្រោយដោយបក្សកណ្តាលនិយមទាំង៤ ចំណែកក្រុមស្តាំនិយម និងឆ្វេងនិយមដទៃទៀត ទទួលបានអាសនៈតែមួយចំនួនប៉ុណ្ណោះ។ ការស្ទង់មតិប៉ុន្មានថ្ងៃមុនការបោះឆ្នោតបានបង្ហាញថា ម្ចាស់ឆ្នោតហូឡង់ ជិតពាក់កណ្តាល នៅតែមិនទាន់សម្រេចរើសអ្នកដែលខ្លួនពេញចិត្តឡើយ៕