កូរ៉េខាងជើងបាននិយាយនៅថ្ងៃពុធនេះថា ខ្លួនបានបាញ់មីស៊ីលតម្រង់គោលដៅពីសមុទ្រទៅដីចូល ក្នុងដែនទឹកភាគខាងលិចរបស់ខ្លួន ជាការបង្ហាញមួយផ្សេងទៀតនៃសមត្ថភាពយោធាដែលកំពុងកើនឡើងរបស់ខ្លួន ខណៈប្រធានាធិបតីអាមេរិកលោក Donald Trump ធ្វើដំណើរទៅកាន់ប្រទេសកូរ៉េខាងត្បូងសម្រាប់កិច្ចប្រជុំកំពូលក្នុងតំបន់។

ទីភ្នាក់ងារសារព័ត៌មានកណ្តាលផ្លូវការរបស់កូរ៉េខាងជើង បានហៅការសាកល្បងកាលពីថ្ងៃអង្គារថាជាជោគជ័យ ហើយបានអះអាងថាអាវុធនេះនឹងរួមចំណែកដល់ការពង្រីកផ្នែកប្រតិបត្តិការនៃយោធានុយក្លេអ៊ែររបស់ប្រទេស។

យោធាកូរ៉េខាងត្បូងមិនបានបញ្ជាក់ភ្លាមៗថាតើខ្លួនបានរកឃើញការសាកល្បងនោះទេ។

ប្រធានាធិបតីអាមេរិក លោក Donald Trump បានអះអាងជាថ្មីថា លោកចង់និយាយជាមួយមេដឹកនាំកូរ៉េខាងជើង លោក Kim Jong-un ស្របពេលលោកបានបង្ហើបពីការបន្ថែមពេលវេលានៃការធ្វើដំណើររបស់លោកទៅកាន់អាស៊ី ប៉ុន្តែគ្មានការឆ្លើយតបណាមួយពីកូរ៉េខាងជើងទេ។

របាយការណ៍របស់កូរ៉េខាងជើង បានកើតឡើងប៉ុន្មានម៉ោងមុនពេលកិច្ចប្រជុំកំពូលដែលរំពឹងទុករវាងលោក Trump និងប្រធានាធិបតីកូរ៉េខាងត្បូងលោក Lee Jae Myung នៅទីក្រុង Gyeongju ជាទីដែលកូរ៉េខាងត្បូងធ្វើជាម្ចាស់ផ្ទះកិច្ចប្រជុំកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិកនៅឆ្នាំនេះ។

លោក Kim Jong Un ធ្លាប់បានបង្ហាញពីការបើកចំហរក្នុងការពិភាក្សាជាមួយលោក Trump ប្រសិនបើសហរដ្ឋអាមេរិកទម្លាក់ចោលការទាមទាររបស់ខ្លួនសម្រាប់ការលុបបំបាត់នុយក្លេអ៊ែររបស់កូរ៉េខាងជើង៕