ប្រធានាធិបតីអ៊ុយក្រែន Volodymyr Zelenskyy បាននិយាយនៅថ្ងៃអង្គារ (២៨ តុលា) ថា ក្រុមមន្ត្រីអ៊ុយក្រែន និងសហភាពអឺរ៉ុប នឹងជួបប្រជុំគ្នានៅចុងសប្តាហ៍នេះ ដើម្បីពិភាក្សាលម្អិតពីផែនការបទឈប់បាញ់មួយ ក្នុងជំហានឆ្ពោះទៅរកការបញ្ចប់សង្រ្គាមជាច្រើនឆ្នាំជាមួយរុស្ស៊ី។

ក្នុងជំនួបជាមួយរដ្ឋមន្ត្រីការបរទេសហូឡង់ លោក Zelenskyy បាននិយាយថា៖ អំឡុងកិច្ចប្រជុំសម្ព័ន្ធនៃឆន្ទៈ មេដឹកនាំអឺរ៉ុបប្រាប់ថា ពួកគេក៏ចង់បង្ហាញចក្ខុវិស័យអំពីដំណោះស្រាយឆាប់រហ័សរួមគ្នា ជាមួយអ៊ុយក្រែន។ នេះមិនមែនជាផែនការបញ្ចប់សង្គ្រាមទាំងស្រុងទេ តែជាបទឈប់បាញ់មួយ"។

លោក Zelenskyy បន្តថា បទឈប់បាញ់ជាមួយរុស្ស៊ី គឺជាជំហានចាំបាច់ដំបូងគេ សម្រាប់ផែនការផ្តួចផ្តើមកិច្ចប្រឹងប្រែងការទូត ហើយទីប្រឹក្សាមកពីភាគីអ៊ុយក្រែន និងអឺរ៉ុប នឹងជួបប្រជុំគ្នានៅប៉ុន្មានថ្ងៃខាងមុខ ដើម្បីជជែកលម្អិត។

ថ្មីៗនេះ សារព័ត៌មាន Bloomberg រាយការណ៍ដោយដកស្រង់ប្រភពមួយចំនួនថា អ៊ុយក្រែន និងអឺរ៉ុបកំពុងរៀបផែនការសន្តិភាព ១២ ចំណុច។ ផែនការនេះនឹងមើលឃើញការបញ្ចប់អរិភាពទាំងស្រុងតាមសមរភូមិជួរមុខ និងការចរចាជាបន្តបន្ទាប់លើទឹកដីកាន់កាប់ ហើយក៏រួមបញ្ចូលផងដែរនូវការវិលត្រឡប់របស់កុមារនិរទេសទាំងអស់ និងការដោះដូរអ្នកទោស។ ការអនុវត្តផែនការបែបនេះនឹងត្រូវធ្វើដោយគណៈកម្មការសន្តិភាពពិសេស ដឹកនាំផ្ទាល់ដោយលោកប្រធានាធិបតីអាមេរិក Donald Trump៕