ប្រធានាធិបតីអាមេរិក លោក Donald Trump បានទៅដល់កូរ៉េខាងត្បូង ជាទីដែលលោករំពឹងថានឹងជួបជាមួយប្រធានាធិបតីចិនលោក Xi Jinping ដើម្បីចុះកិច្ចព្រមព្រៀងបញ្ចប់សង្គ្រាមពាណិជ្ជកម្ម។  

គេរំពឹងថាមេដឹកនាំទាំងពីរនឹងជួបពិភាក្សាគ្នានៅថ្ងៃព្រហស្បតិ៍ស្អែកនេះ ដែលជាជំនួបលើកដំបូង ចាប់តាំងពីលោក Trump បានចាប់ផ្តើមអាណត្តិទីពីររបស់លោក។

លោក Trump បានប្រាប់អ្នកយកព័ត៌មាននៅលើយន្តហោះ Air Force One ដែលធ្វើដំណើរពីប្រទេសជប៉ុនថា លោកគិតថាពួកលោកនឹងមានកិច្ចប្រជុំដ៏ល្អបំផុតជាមួយប្រធានាធិបតីចិនលោក Xi ហើយបញ្ហាជាច្រើននឹងត្រូវបានដោះស្រាយ។ 

លោកថាទំនាក់ទំនងជាមួយប្រទេសចិនគឺល្អណាស់ ដូច្នេះរូបលោកគិតថាជំនួបរវាងលោកទាំងពីរនឹងមានលទ្ធផលល្អបំផុត សម្រាប់ប្រទេសរបស់ពួកលោក និងសម្រាប់ពិភពលោក។   

លោក Trump បាននិយាយថាលោករំពឹងថានឹងកាត់បន្ថយពន្ធរបស់សហរដ្ឋអាមេរិកលើទំនិញរបស់ចិនជាថ្នូរនឹងការប្តេជ្ញាចិត្តរបស់ទីក្រុងប៉េកាំងក្នុងការទប់ស្កាត់ការនាំចេញសារធាតុញៀនហ្វង់តានីល ។ លោកបាននិយាយថា លោកទាំងពីរនឹងធ្វើអ្វីដែលពួកលោកអាចធ្វើបាន ។

យោងតាមក្រុមមន្ត្រីអាមេរិកបានឱ្យដឹងថា ក្រុមអ្នកចរចាមកពីប្រទេសដែលមានសេដ្ឋកិច្ចធំបំផុតទាំងពីររបស់ពិភពលោក សម្រេចបានក្របខណ្ឌគោលមួយកាលពីថ្ងៃអាទិត្យសម្រាប់កិច្ចព្រមព្រៀងមួយដើម្បីផ្អាកការដំឡើងពន្ធរបស់អាមេរិកកាន់តែខ្ពស់ និងការគ្រប់គ្រងការនាំចេញរ៉ែកម្ររបស់ចិន៕