សហរដ្ឋអាមេរិក កាលពីថ្ងៃអង្គារ (២៨ តុលា) បានព្រមានជនជាតិអាមេរិកទាំងអស់នៅក្នុងប្រទេសម៉ាលី ឱ្យចាកចេញពីប្រទេសនេះភ្លាមៗ ដោយប្រើជើងហោះហើរពាណិជ្ជកម្ម ខណៈរដ្ឋាភិបាលរបស់ខ្លួនស្ថិតនៅក្រោមសម្ពាធកាន់តែខ្លាំងឡើងពីក្រុមបះបោរមានទំនាក់ទំនងជាមួយក្រុមភេវរករអាល់កៃដា ដែលកំពុងរាំងខ្ទប់ប្រេងឥន្ធនៈ។

ក្រុមសកម្មប្រយុទ្ធ Jama'at Nusrat បានប្រកាសបិទផ្លូវនាំចូលប្រេងឥន្ធនៈទៅកាន់ប្រទេសអាហ្រ្វិកខាងលិចមួយនេះ ដែលមិនមានព្រំដែនគោកនោះទេ នៅដើមខែកញ្ញាកន្លងទៅ។ ចាប់តាំងពីពេលនោះមក ក្រុមបះបោរទាំងនោះបានបើកការវាយប្រហារលើក្បួនរថយន្តដឹកប្រេង ដែលប៉ុនប៉ងចូលប្រទេស ឬទៅដល់រដ្ឋធានីបាម៉ាកូ។

ស្ថានទូតអាមេរិកប្រចាំម៉ាលី បាននិយាយក្នុងសេចក្ដីថ្លែងការណ៍មួយថា៖ បញ្ហាប្រឈមផ្នែកហេដ្ឋារចនាសម្ព័ន្ធជាបន្តបន្ទាប់នៅម៉ាលី រួមទាំងការរំខាននៃការផ្គត់ផ្គង់ប្រេងសាំង និងម៉ាស៊ូត ការបិទស្ថាប័នសាធារណៈដូចជាសាលារៀន និងសាកលវិទ្យាល័យទូទាំងប្រទេស និងជម្លោះប្រដាប់អាវុធដែលកំពុងបន្តរវាងរដ្ឋាភិបាលម៉ាលី និងក្រុមភេរវករនៅជុំវិញក្រុងបាម៉ាកូ បានបង្កើនភាពមិនអាចទាយទុកជាមុនបាននៃស្ថានភាពសន្តិសុខរបស់រដ្ឋធានីម៉ាលីមួយនេះ។

ក្រុមអ្នកវិភាគ បានពណ៌នាការបិទផ្លូវប្រេងឥន្ធនៈថាជាផ្នែកនៃយុទ្ធនាការរបស់ក្រុមសកម្មប្រយុទ្ធ ដើម្បីដាក់សម្ពាធលើរដ្ឋាភិបាលម៉ាលី ដឹកនាំដោយរបបសឹក ដែលចង់ខ្ទប់ដង្ហើមសេដ្ឋកិច្ចរបស់ប្រទេសនេះ៕