តំបន់ភ្នំ អេវឺរ៉េស (Everest) នៅខាងប្រទេសនេប៉ាល់ និងប្រទេសចិន ត្រូវបានបិទមិនឱ្យចូលទេសចរណ៍នោះទេ នៅថ្ងៃពុធ (២៩ តុលា) នេះ ដោយសារព្រិលធ្លាក់ខ្លាំងក្លាខុសរដូវកាល ហើយឧទ្ធម្ភាគចក្រមួយគ្រឿងបានធ្លាក់បុកសំណុំព្រិលយ៉ាងក្រាស់ឃ្មឹក តែពុំមានអ្នកស្លាប់ឡើយ ក្នុងពេលព្យាយាមជួយសង្គ្រោះអ្នកដើរភ្នំដែលជាប់គាំង។

ដោយទទួលបានការពេញចិត្តពីអ្នកដើរភ្នំ និងអ្នកឡើងភ្នំរាប់ពាន់នាក់ តំបន់ជុំវិញភ្នំអេវឺរ៉េស ត្រូវបានគ្របដណ្តប់ដោយព្រិលចាប់តាំងពីថ្ងៃចន្ទសប្ដាហ៍នេះ ខណៈព្យុះស៊ីក្លូនមកពីឈូងសមុទ្រ Bengal បានបោកបក់ពាសពេញប្រទេសឥណ្ឌា ជំរុញឱ្យមានការព្រិលធ្លាក់ខ្លាំងលើកទីពីរនៅតំបន់ហិម៉ាឡៃ ក្នុងខែនេះ។

អាជ្ញាធរនេប៉ាល់ បានផ្អាកការធ្វើដំណើរលើផ្លូវឡើងភ្នំជាច្រើនខ្សែ ដោយសារភ្លៀងធ្លាក់នៅរយៈកម្ពស់ទាប និងព្រិលខ្លាំងលើផ្លូវឡើងភ្នំខ្ពស់ៗ ហើយបានជំរុញកុំឱ្យអ្នកឡើងភ្នំចេញដំណើរ ឬបន្តដំណើររបស់ពួកគេនៅតំបន់ Annapurna, Manaslu និង Dhaulagiri ដែលមានកំពូលភ្នំខ្ពស់បំផុតមួយចំនួនរបស់ពិភពលោក។ ភ្នំអេវឺរ៉េស នៅផ្នែកខាងតំបន់ទីបេ របស់ប្រទេសចិនវិញ ការលក់សំបុត្រឡើងទស្សនាត្រូវបានផ្អាកតាំងតែពីរសៀលថ្ងៃអង្គារមក។

ក្រុមមន្ត្រីអាកាសធាតុព្យាករថា នឹងមានភ្លៀងធ្លាក់ខ្លាំង និងព្រិលកាន់តែក្រាស់នៅថ្ងៃព្រហស្បតិ៍ និងថ្ងៃសុក្រសប្ដាហ៍នេះ ដោយសារតែការឆ្លងកាត់នៃព្យុះស៊ីក្លូន ម៉ុនថា ដែលបានបោកបក់ចូលរដ្ឋ Andhra Pradesh ភាគអាគ្នេយ៍នៃប្រទេសឥណ្ឌា កាលពីយប់ថ្ងៃអង្គារ៕