ប្រទេសជប៉ុន និងសហរដ្ឋអាមេរិក បាននិយាយថា យ៉ាងហោចណាស់មានក្រុមហ៊ុនជប៉ុនចំនួន១០ក្រុមហ៊ុន ចាប់អារម្មណ៍ក្នុងការចាប់ផ្តើមគម្រោងនៅក្នុងសហរដ្ឋអាមេរិកក្រោមកិច្ចព្រមព្រៀងទ្វេភាគីដែលបានឈានដល់កាលពីដើមឆ្នាំនេះ។

រដ្ឋាភិបាលទាំងពីរកាលពីថ្ងៃអង្គារ បានចេញផ្សាយបញ្ជីពិតប្រាកដមួយបង្ហាញពីតម្លៃក្នុងការវិនិយោគ និងប្រាក់ចំណូលនៅក្នុងគម្រោងជាច្រើនសរុបប្រហែល៤០០ពាន់លានដុល្លារ។ គម្រោងបានគ្របដណ្តប់លើវិស័យថាមពល ការពង្រឹងហេដ្ឋារចនាសម្ព័ន្ធ បញ្ញាសិប្បនិម្មិត(AI) និងវិស័យសំខាន់ៗផ្សេងទៀតសម្រាប់សន្តិសុខសេដ្ឋកិច្ច។

រដ្ឋមន្ត្រីពាណិជ្ជកម្មជប៉ុន លោក Akazawa Ryosei បាននិយាយនៅក្នុងសន្និសីទសារព័ត៌មានថា «យើងមានការលើកទឹកចិត្តក្នុងការមើលឃើញក្រុមហ៊ុនជាច្រើនបង្ហាញចំណាប់អារម្មណ៍។ យើងនឹងអភិវឌ្ឍគម្រោងដែលផ្តល់ផលប្រយោជន៍ដល់ប្រទេសយើងទាំងពីរ ហើយឆ្ពោះទៅមុខជាមួយគ្នា»។

នាយកប្រតិបត្តិនៃធុរកិច្ចជប៉ុនធំៗ ដែលបានបង្ហាញចំណាប់អារម្មណ៍បានចូលរួមក្នុងពិធីមួយកាលពីថ្ងៃអង្គារជាមួយប្រធានាធិបតីសហរដ្ឋអាមេរិក លោក Donald Trump។ ក្នុងសុន្ទរកថានៅឯពិធីជប់លៀងមួយ លោក Trump បានបង្ហាញពីទំនុកចិត្តលើការវិនិយោគបន្ថែមទៀតរបស់ក្រុមហ៊ុនជប៉ុន ដោយលោកបាននិយាយថា «ចាប់តាំងពីការបោះឆ្នោតមក យើងទទួលបានលុយជាច្រើនដែលចូលមក ហើយយើងមានលុយចូលកាន់តែច្រើនថែមទៀត។ ជាថ្មីម្តងទៀត ខ្ញុំ លើកឡើងពីធនាគារ និងក្រុមហ៊ុនមួយចំនួនដូចជា SoftBank, Jera, JCB, Toyota, Mitsubishi, Hitachi, និងក្រុមហ៊ុន Honda»។ ប្រទេសជប៉ុន បានប្តេជ្ញាវិនិយោគទឹកប្រាក់ចំនួន៥៥០ពាន់លានដុល្លារនៅក្នុងសហរដ្ឋអាមេរិក ក្រោមកិច្ចព្រមព្រៀងពាណិជ្ជកម្មដែលបានឈានដល់កាលពីខែកក្កដា។