សហព័ន្ធអន្តរជាតិកាកបាទក្រហម និងអឌ្ឍចន្ទក្រហម (IFRC) បានឲ្យដឹងកាលពីថ្ងៃអង្គារ (ទី២៨ ខែតុលា) ថា អ្នកស្ម័គ្រចិត្តចំនួន ៥នាក់ ត្រូវបានសម្លាប់ ហើយ ៣នាក់ផ្សេងទៀតកំពុងបាត់ខ្លួន នៅក្នុងប្រទេសស៊ូដង់។

IFRC បានឲ្យដឹងថា អ្នកស្ម័គ្រចិត្តទាំង ៥នាក់ ត្រូវបានសម្លាប់កាលពីថ្ងៃទី២៧ ខែតុលា នៅទីក្រុង Bara ក្នុងរដ្ឋ North Kordofan ខណៈពេលដែលពួកគេកំពុងចែកចាយអាហារ និងពាក់អាវកាក់ផ្លូវការ។ យ៉ាងណាក្ដី ស្ថាប័ននេះមិនបានផ្តល់ព័ត៌មានលម្អិត អំពីរបៀបដែលពួកគេត្រូវបានសម្លាប់ ឬដាក់ការទទួលខុសត្រូវទៅលើអ្នកណាឡើយ។

កងកម្លាំងគាំទ្ររហ័សរបស់ស៊ូដង់ (RSF) ដែលបានជាប់នៅក្នុងសង្គ្រាមស៊ីវិលជាមួយកងទ័ពស៊ូដង់ ចាប់តាំងពីខែមេសា ឆ្នាំ២០២៣ មក បានកាន់កាប់ទីក្រុងយុទ្ធសាស្ត្រ Bara នៅដើមសប្តាហ៍នេះ

សកម្មជន និងក្រុមសិទ្ធិមនុស្សនានា បានចោទប្រកាន់ថា ការមានប្រៀបថ្មីៗរបស់ RSF នៅភាគកណ្តាលស៊ូដង់ និងនៅតំបន់ Darfur កើតមានឡើងអមដោយការស្លាប់ជនស៊ីវិលរាប់រយនាក់។

ភាគីជម្លោះទាំង២ បានច្រានចោលការចោទប្រកាន់កន្លងមក ជុំវិញការរំលោភបំពាន ហើយជំនួសវិញ បានចោទគ្នាទៅវិញទៅមកថា បានប្រព្រឹត្តទង្វើទាំងនោះ៕