ឆ្លៀតថ្ងៃឈប់សម្រាកបុណ្យជាតិអបអរ ព្រះរាជពិធីខួបលើកទី២១ នៃការគ្រងព្រះបរមសិរីរាជសម្បត្តិ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នាថ្ងៃទី២៩ ខែតុលា នេះ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានចុះពិនិត្យមណ្ឌលសុខភាពវិហារសួគ៌ ដោយពុំមានការជូនដំណឹងជាមុន ដែលការចុះនេះបានអនុញ្ញាតឱ្យធ្វើការវាយតម្លៃដោយផ្ទាល់លើគុណភាពសេវាសុខាភិបាលបម្រើជូនប្រជាពលរដ្ឋក្នុងតំបន់។

ការវាយតម្លៃនោះ មានចំណុចកត់សម្គាល់មួយចំនួន៖

- ការទទួលអ្នកជំងឺ៖ ទទួលបានការពេញចិត្ត ដោយមានស្មារតីសហការល្អ និងអាកប្បកិរិយារួសរាយរាក់ទាក់ល្អ។

- ការត្រួតពិនិត្យ និងព្យាបាលជំងឺ៖ បានអនុវត្តទាន់ពេលវេលា បង្ហាញពីការខិតខំរបស់បុគ្គលិកសុខាភិបាល។

- ការទុកដាក់ថ្នាំសង្កូវ និងសម្ភារៈពេទ្យ៖ មានកម្រិតមធ្យម ត្រូវការការរៀបចំ និងតាមដានប្រសើរជាងមុន។

- ភាពស្អាត និងអនាម័យ៖ ត្រូវការកែលម្អអោយបានប្រសើរឡើង។

ក្រុមការងារនៃមណ្ឌលសុខភាព ដឹកនាំដោយប្រធានមណ្ឌល បានទទួលយកការកែលម្អ និងប្តេជ្ញាចិត្តពង្រឹងការខិតខំប្រឹងប្រែង ដើម្បីធានាបាននូវបរិស្ថានផាសុខភាព អនាម័យ សុវត្ថិភាព ក្នុងការបម្រើសេវាសុខាភិបាលដែលមានគុណភាពជូនប្រជាពលរដ្ឋអោយបានទូលាយក្នុងមូលដ្ឋាន។

ការចុះពិនិត្យនេះក៏ឆ្លុះបញ្ចាំងពីការប្តេជ្ញារបស់ថ្នាក់ដឹកនាំគ្រប់លំដាប់ នៃក្រសួងសុខាភិបាលក្នុងការពង្រឹងអភិបាលកិច្ច លើទីលានអនុវត្ត ការស្តាប់ពីក្រុមការងារមូលដ្ឋាន ការគាំទ្រចំពោះបុគ្គលិកសុខាភិបាលក្នុងសហគមន៍ និងធានាថាប្រជាពលរដ្ឋគ្រប់រូប ទោះនៅទីណាក៏ដោយ ទទួលបានសេវាសុខាភិបាលសមរម្យ និងប្រសើរឡើង ព្រមទាំងរស់នៅដោយសុខដុម។

គួរបញ្ជាក់ថា សាររបស់ប្រធានស្ថាប័នសុខាភិបាលជូនចំពោះមូលដ្ឋានសុខាភិបាលគ្រប់ឃុំទូទាំងប្រទេស៖

"ការកែលម្អគុណភាពសេវាសុខាភិបាលត្រូវការភាពម៉ត់ចត់ សេចក្តីថ្លៃថ្នូរ និងការគោរពតាមស្តង់ដារបច្ចេកទេស និងអនាម័យ។ មណ្ឌលសុខភាពនីមួយៗត្រូវក្លាយជាគំរូនៃការជឿទុកចិត្តសម្រាប់ប្រជាពលរដ្ឋ"៕