រដ្ឋមន្ត្រីការពារជាតិអ៊ីស្រាអែល លោក Israel Katz នៅថ្ងៃពុធ (ទី២៩ ខែតុលា) នេះ បានព្រមានថ្នាក់ដឹកនាំក្រុមហាម៉ាសថា ពួកគេនឹងមិនមានអភ័យឯកសិទ្ធិ ពោលគឺគ្មានសិទ្ធិពិសេសអ្វីឡើយ ដោយការកត់សម្គាល់នេះកើតឡើងបន្ទាប់ពីមានការវាយប្រហារតាមអាកាសជាបន្តបន្ទាប់របស់អ៊ីស្រាអែលលើតំបន់ហ្កាហ្សា ដែលបានកើតឡើងក្រោយកងទ័ពរបស់ខ្លួនរងការវាយប្រហារ។

អមដោយការនិយាយសំដៅទៅមេដឹកនាំនយោបាយរបស់ក្រុមហាម៉ាសដែលកំពុងរស់នៅទីក្រុងដូហា ប្រទេសកាតា លោក Katz បានបញ្ជាក់ថា៖ «នឹងមិនមានអភ័យឯកសិទ្ធិជាដាច់ខាត សម្រាប់នរណាម្នាក់ នៅក្នុងចំណោមថ្នាក់ដឹកនាំរបស់អង្គការភេរវករហាម៉ាស ពោលគឺទាំងអ្នកដែលធ្វើការក្នុងការិយាល័យ ឬអ្នកដែលលាក់ខ្លួន នៅក្នុងផ្លូវរូងក្រោមដី»។

លោកបានបន្ថែមថា៖ «អ្នកណាក៏ដោយដែលលើកដៃប្រឆាំងនឹងទាហាន (អ៊ីស្រាអែល) នឹងត្រូវប្រឈមជាមួយនឹងផលវិបាកធ្ងន់ធ្ងរ។ (យោធាអ៊ីស្រាអែល) ត្រូវបានណែនាំឲ្យចាត់វិធានការយ៉ាងម៉ឺងម៉ាត់ ប្រឆាំងនឹងគ្រប់គោលដៅរបស់ក្រុមហាម៉ាស ហើយនឹងបន្តធ្វើដូច្នេះ»។

ប្រទេសកាតាបានដើរតួនាទីជាអ្នកសម្រុះសម្រួលដ៏សំខាន់ នៅក្នុងកិច្ចចរចាដោយប្រយោល រវាងអ៊ីស្រាអែល និងក្រុមហាម៉ាស ចាប់តាំងពីការផ្ទុះសង្រ្គាម នៅខែតុលា ឆ្នាំ២០២៣ ហើយស្ថិតក្នុងចំណោមអ្នកធានានៃកិច្ចព្រមព្រៀងសន្តិភាពដ៏ផុយស្រួយ រួមជាមួយអេហ្ស៊ីប សហរដ្ឋអាមេរិក និងទួរគី។

កាលពីថ្ងៃទី៩ ខែកញ្ញា អ៊ីស្រាអែលបានវាយប្រហារក្រុមអ្នកចរចារបស់ក្រុមហាម៉ាស នៅទីក្រុងដូហា ដែលបង្កឲ្យមានការថ្កោលទោសពីគ្រប់ទិសទី និងនាំឲ្យមានការស្តីបន្ទោសពីប្រធានាធិបតីអាមេរិក លោក Donald Trump៕