សហភាពអឺរ៉ុប (EU) នៅថ្ងៃពុធ (ទី២៩ ខែតុលា) នេះ បានអំពាវនាវឲ្យ «គ្រប់ភាគី» គោរពបទឈប់បាញ់ នៅតំបន់ហ្កាហ្សា ខណៈដែលមន្ត្រីជាន់ខ្ពស់របស់ប្លុក បានរិះគន់ការវាយប្រហារតាមអាកាសរបស់អ៊ីស្រាអែលលើដែនដីប៉ាឡេស្ទីន។

អនុប្រធានគណៈកម្មាធិការអឺរ៉ុប លោកស្រី Teresa Ribera បានលើកឡើងនៅក្នុងការបង្ហោះលើបណ្ដាញសង្គមថា៖ «យើងត្រូវការឱកាស ដើម្បីមានសន្តិភាព មិនមែនជាលេស ដើម្បីបើកការវាយប្រហារថ្មីនោះទេ»។ យ៉ាងណាក្ដី ការរិះគន់របស់លោកស្រី លើអ៊ីស្រាអែលនេះ មិនត្រូវបានបន្ទរដោយផ្នែកប្រតិបត្តិរបស់ EU ឡើយ។

អ្នកនាំពាក្យគណៈកម្មាធិការ លោក Anouar El Anouni បានលើកឡើងថា «យើងសូមរំលឹកឡើងវិញនូវការអំពាវនាវរបស់យើងទៅកាន់គ្រប់ភាគីឲ្យបន្តគោរពបទឈប់បាញ់» តែមិនបាននិយាយអំពីការវាយប្រហារតាមអាកាសរបស់អ៊ីស្រាអែល នាសប្តាហ៍នេះ ដែលទីភ្នាក់ងារការពារជនស៊ីវិលរបស់តំបន់ហ្កាហ្សា បានឲ្យដឹងថា បានសម្លាប់មនុស្សជាង ១០០នាក់។

លោក El Anouni បានបន្តថា៖ «យើងជំរុញឲ្យភាគីទាំងអស់ប្តេជ្ញាចិត្តយ៉ាងពេញលេញ ក្នុងការអនុវត្តគ្រប់ដំណាក់កាលនៃផែនការនេះ ដើម្បីបញ្ចប់ជម្លោះ នៅតំបន់ហ្កាហ្សា និងជៀសវាងសកម្មភាពណាមួយ ដែលអាចប៉ះពាល់ដល់កិច្ចព្រមព្រៀង»។ លោកបានបន្ថែមថា៖ «គ្មានដំណោះស្រាយយោធា ដើម្បីដោះស្រាយជម្លោះនេះឡើយ»។

នាយកប្រតិបត្តិរបស់ EU បានអនុវត្តទង្វើតុល្យភាពដ៏ទន់ភ្លន់ ជុំវិញសង្គ្រាម នៅតំបន់ហ្កាហ្សា ខណៈដែលប្លុកមានសមាជិក ២៧ប្រទេស នៅតែខ្វែងគំនិតគ្នា រវាងអ្នកគាំទ្រអ៊ីស្រាអែល និងប្រទេសដែលមានសមានចិត្ត ចំពោះប៉ាឡេស្ទីន។

អ៊ីស្រាអែលបានប្រាប់ឲ្យដឹងថា ខ្លួនបានវាយប្រហារលើគោលដៅរាប់សិបរបស់ក្រុមហាម៉ាស ដោយដែនដីប៉ាឡេស្ទីន ជួបប្រទះនឹងស្ថានភាពទម្លាក់គ្រាប់បែកដ៏អាក្រក់បំផុតលើកដំបូង គិតចាប់តាំងពីបទឈប់បាញ់ដែលសម្របសម្រួលដោយអាមេរិកចូលជាធរមាន កាលពីដើមខែនេះ។ អ៊ីស្រាអែលបានចោទប្រកាន់ក្រុមហាម៉ាសថា បានរំលោភបទឈប់បាញ់ដែលបានចាប់ផ្តើមកាលពីថ្ងៃទី១០ ខែតុលា ដោយមិនប្រគល់សាកសពចំណាប់ថ្នូរឲ្យលឿនល្មមអាចទទួលយកបាន និងបានសម្លាប់ទាហានអ៊ីស្រាអែលម្នាក់៕