ក្រុមអាជ្ញាធរនៅរដ្ឋធានីញូវដែល្លី ប្រទេសឥណ្ឌា បានចាប់ផ្តើមសាបព្រួសដុំពពក ដើម្បីបង្កើតជាភ្លៀងសិប្បនិម្មិត និងធ្វើឲ្យកម្រិតកង្វក់បរិយាកាសធ្លាក់ចុះនៅក្នុងទីក្រុងមួយនេះ ។

វិធីសាស្រ្តព្យាយាមបង្កើនទឹកភ្លៀង តាមរយៈការបន្ថែមភាគល្អិតគីមីតូចៗចូលទៅក្នុងដុំពពក ដើម្បីបង្កើតជាដំណក់ទឹកដែលវាចុងក្រោយនឹងវិវត្តន៍ទៅជាដំណក់ទឹកភ្លៀង ។

បើទោះបីជាប្រទេសជាច្រើនកាលពីមុនបានប្រើប្រាស់វិធីសាស្រ្តសាបព្រួសដុំពពក បង្កើតជាភ្លៀងដើម្បីធ្វើឲ្យគុណភាពខ្យល់ល្អប្រសើរ ឬស្រោចស្រពដំណាំ អំឡុងគ្រោះរាំងស្ងួតយ៉ាងណាក្តី នេះគឺជាលើកដំបូងហើយដែលត្រូវបានប្រើប្រាស់នៅក្នុងរដ្ឋធានីប្រទេសឥណ្ឌា ។

ប្រសិទ្ធិភាពនៃការសាបព្រួសដុំពពក គឺជាកម្មវត្ថុនៃការជជែកដេញដោលរបស់ក្រុមអ្នកវិទ្យាសាស្រ្តដែលការសិក្សាបង្ហាញពីលទ្ធផលចម្រុះខុសប្លែកគ្នា ។

លោក Manjinder Singh Sirsa គឺជារដ្ឋមន្រ្តីបរិស្ថានក្រុងដែល្លី និយាយថា បើសិនជាការសាកល្បងនេះទទួលបានជោគជ័យ ផែនការរយៈពេលយូរនឹងត្រូវអនុវត្តរហូតដល់ខែកុម្ភៈ ឆ្នាំក្រោយ ។

រូបថតសន្លឹកចែករំលែកដោយវិទ្យាសា្ថន IIT-Kanpur ឃើញសារធាតុគីមី ត្រូវបានបញ្ចេញពីអណ្តាតភ្លើងភ្ជាប់ជាមួយយន្តហោះ ពេលដែលវាហោះលើផ្ទៃមេឃមានពពក ។

កាលពីថ្ងៃអង្គារនេះម្សិលមិញ ផ្សែងអ័ព្ទពុលបានហ៊ុមព័ទ្ធរដ្ឋធានីញូវដែល្លី ពេលដែលគុណភាពខ្យល់ស្ថិតក្នុងកម្រិតគ្មានសុខភាពខ្លាំងនៅតាមតំបន់ជាច្រើនក្នុងរដ្ឋធានីរបស់ប្រទេសមួយនេះ ។

រដ្ឋធានីដែល្លី និងតំបន់ជុំវិញ តែងតែគ្របដណ្តប់ដោយផ្សែងអ័ព្ទយ៉ាងក្រាស់អំឡុងរដូវរងា ពេលដែលអាកាសធាតុត្រជាក់ និងខ្យល់ធ្ងន់ទាក់ជាប់ធូលីសំណង់ ការបំភាយឧស្ម័នរថយន្ត និងផ្សែងបង្កឡើងពីការដុតកាកសំណល់កសិកម្ម ធ្វើឲ្យប្រជាពលរដ្ឋភាគច្រើនក្នុងចំណោមពលរដ្ឋ ២០លាននាក់នៅក្នុងទីក្រុងមួយនេះ កើតមានបញ្ហាផ្លូវដង្ហើម ៕