ក្រុមមន្ត្រីបាននិយាយថា ទឹកជំនន់បានគ្របដណ្ដប់ពាសពេញភាគកណ្តាលប្រទេសវៀតណាម ក្នុងសប្តាហ៍នេះ បន្ទាប់ពីមានភ្លៀងធ្លាក់ខ្លាំង ដែលបណ្តាលឱ្យចំនួនអ្នកស្លាប់កើនឡើងដល់ ១០នាក់ និង ៥ នាក់បន្តបាត់ខ្លួន ខណៈទីក្រុងនានា ដីស្រែ និងបណ្តាញដឹកជញ្ជូន ត្រូវបានរងផលប៉ះពាល់ដោយសារទឹកជំនន់នេះ។ 

យោងតាមអាជ្ញាធរក្នុងតំបន់បានឱ្យដឹងថា មនុស្ស៦នាក់បានស្លាប់ និង៤នាក់ត្រូវបានរាយការណ៍ថាបានបាត់ខ្លួននៅក្នុងទីក្រុងឆ្នេរសមុទ្រ ដាណាង(Danang) ជាកន្លែងដែលមនុស្សចំនួន ១៩ នាក់ផ្សេងទៀតបានរងរបួស ហើយផ្ទះសម្បែង ដំណាំ និងសត្វពាហនៈរាប់ពាន់ក្បាល ត្រូវបានហូរគួចតាមទឹកជំនន់។

ក្រសួងបរិស្ថានបាននិយាយកាលពីថ្ងៃពុធសប្ដាហ៍នេះថា ទឹកជំនន់បង្កឡើងដោយភ្លៀងធ្លាក់ខ្លាំងនៅភាគកណ្តាលប្រទេសវៀតណាមក្នុងសប្តាហ៍នេះ បានជន់លិចលំនៅឋានជាង១០០.០០០ខ្នង។   

បណ្ដាខេត្តជាប់មាត់សមុទ្ររបស់ប្រទេសវៀតណាមបានទទួលរងនូវភ្លៀងធ្លាក់យ៉ាងខ្លាំងចាប់តាំងពីថ្ងៃអាទិត្យ ជាមួយនឹងកំណត់ត្រារហូតដល់១,៧ ម៉ែត្រ ក្នុងរយៈពេល២៤ ម៉ោង។  

គួររម្លឹកថា ប្រទេសវៀតណាមភាគខាងជើង ក៏បានជួបប្រទះទឹកជំនន់ធ្ងន់ធ្ងរផងដែរនៅដើមខែនេះ ក្រោយភ្លៀងធ្លាក់ខ្លាំង ដោយសារព្យុះទីហ្វុង Matmo៕