ប្រទេសលីទុយអានី កំពុងរឹតបន្តឹងព្រំដែនរបស់ខ្លួនជាមួយប្រទេសបេឡារុស រយៈពេលមួយខែបន្ទាប់ពីបាឡុងផ្ទុកបារីរត់ពន្ធខុសច្បាប់ជាបន្តបន្ទាប់ ចូលទៅក្នុងដែនអាកាសរបស់ខ្លួន។

គណៈរដ្ឋមន្ត្រីរបស់ប្រទេសលីទុយអានី បានសម្រេចកាលពីថ្ងៃពុធក្នុងការបន្តផ្អាកចរាចរណ៍នៅច្រកឆ្លងកាត់ Salcininkai នៅភាគអាគ្នេយ៍រហូតដល់ចុងខែវិច្ឆិកា ខណៈមានការរឹតបន្តឹងយ៉ាងខ្លាំងចំពោះច្រកឆ្លងកាត់ផ្សេងទៀតរបស់ខ្លួនមានច្រក Medininkai នៅជិតរដ្ឋធានី Vilnius នេះបើយោងតាមទីភ្នាក់ងារសារព័ត៌មាន BNS ។

រដ្ឋមន្ត្រីក្រសួងមហាផ្ទៃ លោក Vladislav Kondratovic បាននិយាយថា វិធានការនេះនឹង «ផ្ញើសារយ៉ាងច្បាស់លាស់ទៅកាន់ប្រទេសជិតខាងដែលគ្មានភាពរាក់ទាក់របស់យើង» ជុំវិញការលុកលុយដោយបាឡុង ដែលបានរំខានដល់ចរាចរណ៍ផ្លូវអាកាសនៅអាកាសយានដ្ឋាន Vilnius កាលពីចុងសប្តាហ៍ ហើយបានជំរុញឱ្យខ្លួនបិទច្រកឆ្លងកាត់ទាំងពីរ។

សារព័ត៌មាន BNS បានរាយការណ៍ថា អ្នកការទូត ពលរដ្ឋលីទុយអានី ពលរដ្ឋសហភាពអឺរ៉ុប និងរដ្ឋសមាជិកណាតូនិងសមាជិកគ្រួសាររបស់ពួកគេ ព្រមទាំងជនបរទេសដែលមានលិខិតអនុញ្ញាតពីប្រទេសលីទុយអានីមានសុពលភាព នឹងនៅតែត្រូវបានអនុញ្ញាតឱ្យចូលប្រទេសលីទុយអានី តាមរយៈ ច្រក Medininkai ។ ការលើកលែងនេះក៏អនុវត្តចំពោះអ្នកកាន់ទិដ្ឋាការមនុស្សធម៌ផងដែរ។

នាយករដ្ឋមន្រ្តី លោកស្រី Inga Ruginiene បាននិយាយថា ការរឹតបន្តឹងអាចត្រូវបានបន្ថែមពេល។ លោកស្រីបានប្រាប់អ្នកសារព័ត៌មានថា «យើងមិនអាច មិនឆ្លើយតបចំពោះការវាយប្រហារកូនកាត់ប្រឆាំងនឹងប្រទេសលីទុយអានីបានទេ»។