​វាយកូនបាល់៖ ​អតីត​ជើងឯក US Open កីឡាករ​អា​ហ្ស​ង់​ទីន Juan Martin del Potro ទំនងជា​សំរេចចិត្ត​ចូលនិវត្តន៍​ហើយ​ក្រោយ​វិល​មក​ប្រកួត​ដំបូង​បរាជ័យ​ក្នុង​ជុំ​ទី១ កម្មវិធី Argentina Open​។ ​​កីឡាករ​វ័យ ៣៣ឆ្នាំ​ដែល​អវត្តមាន ២ឆ្នាំកន្លះ​ដោយសារ​របួស​នោះបាន​វិល​មក​ទីលាន​វិញ​ជា​លើកដំបូង តែ​បាន​ត្រឹម​បរាជ័យ​ក្រោម​ស្នាដៃ​កីឡាករ Federico Delbonis ៦-១ និង ៦-៣​។

​​ក្រោយ​ចប់​ការប្រកួត Martin del Potro បាន​សម្រក់​ទឹកភ្នែក និង​និយាយ​ទៅកាន់​អ្នកគាំទ្រ​ថា រូបគេ​ប្រហែល​មិន​ត្រលប់​មកវិញ​ទេ​។ Martin del Potro បានទទួល​ការវះកាត់​ជង្គង់​ដល់​ទៅ ៤លើក​តាំង​ប្រកួត​ចុងក្រោយ​នៅ​កម្មវិធី​មួយ​ត្រៀម Wimbledon កាលពី​ឆ្នាំ២០១៩​។ ​​អតីត​កីឡាករ​លំដាប់​លេខ ៣ ពិភពលោក​រូបនេះ​នៅពេលនេះ​ធ្លាក់​ឈរ​លំដាប់ថ្នាក់​លេខ ៧៥៧ ពិភពលោក​។ ​​រំលឹកថា Martin del Potro ធ្លាប់​យកឈ្នះ Roger Federer នៅ​វគ្គ​ផ្តាច់ព្រ័ត្រ​លើក​ពាន US Open កាលពី​ឆ្នាំ២០០៩ ដែលជា​ជើងឯក Grand Slam តែមួយគត់​របស់គេ​។​ ​​ក្រោយមក Del Potro ក៏​ធ្លាប់​ឡើងដល់​វគ្គ​ពាក់កណ្តាល​ផ្តាច់ព្រ័ត្រ Wimbledon ផងដែរ​នៅ​ឆ្នាំ២០១៣ ដោយ​ចាញ់ Novak Djokovic និង​ធ្លាប់​ឡើង​វគ្គ​ពាក់កណ្តាល​ផ្តាច់ព្រ័ត្រ French Open ពីរលើក​ផងដែរ​៕

​អត្ថបទ​៖​នាង សុភា​វុ​ធ