ប្រធានាធិបតីអាមេរិក លោក Donald Trump បាននិយាយនៅថ្ងៃព្រហស្បតិ៍ (៣០ តុលា) នេះថា លោកបានផ្តល់ការយល់ព្រមឱ្យកូរ៉េខាងត្បូងរួចហើយ ក្នុងការសាងសង់នាវាមុជទឹកដើរដោយថាមពលនុយក្លេអ៊ែរ នៅក្នុងជំហានផ្លាស់ប្តូរយ៉ាងសំខាន់ដែលនឹងអនុញ្ញាតឱ្យទីក្រុងសេអ៊ូល ឆ្ពោះទៅចូលរួមក្នុងចំណោមបណ្ដាប្រទេសមួយក្ដាប់តូច ដែលមាននាវាបែបនេះ។

លោក Trump សរសេរបង្ហោះលើបណ្តាញសង្គមថា នាវាមុជទឹកនេះនឹងត្រូវសាងសង់ក្នុងមូលដ្ឋានផលិតនាវា Philadelphia នៅអាមេរិក ជាទីដែលក្រុមហ៊ុនកូរ៉េខាងត្បូង បានបង្កើនការវិនិយោគ។ ប្រធានាធិបតីអាមេរិករូបនេះ ដែលបានជួបប្រធានាធិបតីកូរ៉េខាងត្បូង លោក Lee Jae Myung និងមេដឹកនាំក្នុងតំបន់ផ្សេងទៀតអំឡុងទស្សនកិច្ចអាស៊ី ក៏បាននិយាយផងដែរថា ទីក្រុងសេអ៊ូល បានយល់ព្រមទិញប្រេង និងឧស្ម័នក្នុងបរិមាណដ៏ច្រើនពីសហរដ្ឋអាមេរិក។

ខណៈដែលកូរ៉េខាងត្បូង មានឧស្សាហកម្មផលិតនាវាទំនើបៗរួចទៅហើយ លោក Trump មិនបានគូសបញ្ជាក់ឡើយថា តើបច្ចេកវិទ្យានាវាមុជទឹកដើរដោយថាមពលនុយក្លេអ៊ែរនោះនឹងមកពីទីណា ខណៈមានតែប្រទេសមួយចំនួនតូចប៉ុណ្ណោះដែលមានយានប្រភេទនេះ នាពេលបច្ចុប្បន្ន។

ជាមួយគ្នានេះ មេដឹកនាំទាំងពីរបានសម្រេចសេចក្តីលម្អិតនៃកិច្ចព្រមព្រៀងពាណិជ្ជកម្ម ក្នុងកិច្ចប្រជុំកំពូលនៅកូរ៉េខាងត្បូង កាលពីថ្ងៃពុធ។ ក្នុងជំនួបនោះ លោក Lee ក៏បានស្នើអាមេរិក ឱ្យអនុញ្ញាតឱ្យកូរ៉េខាងត្បូង កែច្នៃឥន្ធនៈនុយក្លេអ៊ែរឡើងវិញ។ គួរឱ្យដឹងថា ទីក្រុងសេអ៊ូល ត្រូវបានហាមឃាត់មិនឱ្យដំណើរការកែច្នៃឡើងវិញ ដោយគ្មានការយល់ព្រមពីអាមេរិកឡើយ ក្រោមកិច្ចព្រមព្រៀងរវាងប្រទេសទាំងពីរ៕