មេដឹកនាំប្រឆាំងរបស់ប្រទេសកាមេរូន បានប្តេជ្ញាថា នឹងតស៊ូរហូតដល់ទទួលបាន «ជ័យជម្នះនៅទីបំផុត» លើលោកប្រធានាធិបតី Paul Biya ដោយអំពាវនាវឲ្យអ្នកគាំទ្ររបស់លោកបន្តការប្រមូលផ្តុំ ខណៈដែលក្រុមសង្គមស៊ីវិល បានថ្កោលទោសការស្លាប់ និងការចាប់ខ្លួន អំឡុងការតវ៉ា នៅក្នុងទីក្រុងនានា។

លោក Biya វ័យ ៩២ឆ្នាំ ដែលជាមេដឹកនាំមានវ័យចំណាស់ជាងគេបំផុតរបស់ពិភពលោក បានគ្រប់គ្រងកាមេរូន ចាប់តាំងពីឆ្នាំ១៩៨២ មក។ ជ័យជម្នះរបស់លោក នៅក្នុងការបោះឆ្នោតថ្ងៃទី១២ ខែតុលា ដែលត្រូវបានប្រកាសកាលពីថ្ងៃចន្ទដើមសប្ដាហ៍នេះ បានធ្វើឲ្យមានភាពតានតឹងកាន់តែខ្លាំងឡើងៗ នៅក្នុងប្រទេសដែលផលិតកាកាវ និងប្រេង ជាទីដែលអ្នករិះគន់ចោទប្រកាន់លោកថា បានប្រើស្ថាប័នរដ្ឋ ដើម្បីបន្តរក្សាអំណាច។

កាលពីព្រឹកថ្ងៃពុធ (ទី២៩ ខែតុលា) អ្នកគាំទ្ររបស់លោក Issa Tchiroma Bakary ជាអតីតអ្នកនាំពាក្យរដ្ឋាភិបាលដែលបានប្រែក្លាយទៅជាគូប្រជែងរបស់លោក Biya បានធ្វើដំណើរជាថ្មីម្ដងទៀតទៅកាន់ដងផ្លូវនៃទីក្រុងសេដ្ឋកិច្ច Douala ដែលនៅតែពោរពេញទៅដោយកម្ទេចកម្ទី និងសំបកកង់រថយន្ត បន្ទាប់ពីមានភាពចលាចលជាច្រើនថ្ងៃ។

នៅក្នុងសន្និសីទសារព័ត៌មានមួយកាលពីថ្ងៃពុធ ក្រុមសង្គមស៊ីវិល ដែលគេស្គាល់ថា «ក្រោកឈរឡើង ដើម្បីកាមេរូន» បានប្រាប់ឲ្យដឹងថា យ៉ាងហោចណាស់មនុស្ស ២៣នាក់ ត្រូវបានសម្លាប់ដោយកងកម្លាំងសន្តិសុខដែលបានបង្ក្រាបក្រុមអ្នកតវ៉ា ចាប់តាំងពីចុងសប្តាហ៍កន្លងមក។

ទីភ្នាក់ងារសារព័ត៌មាន Reuters មិនអាចបញ្ជាក់ដោយឯករាជ្យបានឡើយ សម្រាប់តួលេខទាំងនោះ ហើយអ្នកនាំពាក្យរដ្ឋាភិបាល ក៏មិនបានឆ្លើយតបនោះដែរ សម្រាប់សំណើសុំការអត្ថាធិប្បាយ។ នៅតំបន់ផ្សេងទៀតនៃទីក្រុងដែលមានភាពអ៊ូអរនេះ ការធ្វើអាជីវកម្មបានចាប់ផ្តើមឡើងវិញជាបណ្តើរៗហើយ បន្ទាប់ពីបានបិទដោយសារតែការតវ៉ា និងភាពចលាចល ខណៈដែលចរាចរណ៍នៅមិនទាន់មមាញឹកនោះទេ៕