រដ្ឋអាជ្ញាទីក្រុងប៉ារីស បានឲ្យដឹងនៅថ្ងៃព្រហស្បតិ៍ (ទី៣០ ខែតុលា) នេះថា នគរបាលបារាំងបានចាប់ខ្លួនមនុស្ស ៥នាក់បន្ថែមទៀត ក្នុងរួមមានទាំងជនសង្ស័យសំខាន់ម្នាក់ផងដែរ ជុំវិញការលួចគ្រឿងអលង្ការ នៅសារមន្ទីរ Louvre ក្នុងខែនេះ។

អមដោយការបន្ថែមថា គ្មានវត្ថុត្រូវបានលួចដែលមានតម្លៃប៉ាន់ប្រមាណ ១០២លានដុល្លារ ត្រូវបានរកឃើញនោះ លោកស្រី Laure Beccuau និយាយអំពីជនសង្ស័យសំខាន់នេះថា៖ «យើងបានតាមដានរូបគេមិនដាច់ពីក្រសែភ្នែករបស់យើង»។

លោក Beccuau បាននិយាយថា ភស្តុតាងតាមរយៈ DNA បានភ្ជាប់ជនសង្ស័យដ៏សំខាន់នេះទៅនឹងចោរកម្មនោះ ដោយលោកស្រី Beccuau បាននិយាយថា ជនសង្ស័យនេះស្ថិតក្នុងចំណោមក្រុមបុរស ៤នាក់ ដែលបានធ្វើសកម្មភាពល្មួចដោយឥតញញើត កាលពីថ្ងៃទី១៩ ខែតុលា។

លោកស្រីបាននិយាយថា៖ «សម្រាប់បុគ្គលផ្សេងទៀតដែលស្ថិតនៅក្នុងការឃុំឃាំងរបស់នគរបាល ពួកគេគឺជាអ្នកដែលអាចផ្តល់ឲ្យយើងនូវព័ត៌មាន អំពីដំណើរនៃព្រឹត្តិការណ៍នេះ» តែលោកស្រីបានបញ្ជាក់បន្ថែមថា វាគឺ «លឿនពេក» ដែលមិនអាចផ្តល់ព័ត៌មានលម្អិតបន្ថែមអំពីជនសង្ស័យបាន។

ការឃុំខ្លួនជនទាំង ៥នាក់នេះ បានកើតឡើងកាលពីថ្ងៃពុធ ទាំងនៅក្នុង និងជុំវិញទីក្រុងប៉ារីស ជាពិសេសនៅតំបន់ Seine-Saint-Denis ដែលជាតំបន់មួយនៅខាងក្រៅរដ្ឋធានីរបស់ប្រទេសបារាំង។

គួរបញ្ជាក់ថា ក្រុមអ្នកស៊ើបអង្កេតរាប់សិបនាក់ បាននិងកំពុងតាមប្រមាញ់ក្រុមចោរមានគ្នា ៤នាក់ ដែលបានប្រើប្រាស់រថយន្តដឹកទំនិញ ១គ្រឿង និងឧបករណ៍កាត់ទម្លុះ ដើម្បីទម្លាយចូលទៅក្នុងវិចិត្រសាលជាន់ទី១ ក្នុងសារមន្ទីរ ដោយបានរត់គេចខ្លួនជាមួយនឹងគ្រឿងអលង្ការដ៏មានតម្លៃ ៨មុខ៕