នាយករដ្ឋមន្រ្តីកាតាព្រះអង្គម្ចាស់ Sheikh Mohammed bin Abdulrahman al-Thani បានមានបន្ទូលថា ការវាយប្រហារលើទាហានអ៊ីស្រាអែលនៅតំបន់ហ្កាហ្សា និងការវាយប្រហារឆ្លើយតបវិញរបស់អ៊ីស្រាអែល គឺជារឿងគួរឲ្យខកចិត្តខ្លាំងណាស់ ។

ក្រសួងសុខាភិបាលហ្កាហ្សា បានឲ្យដឹងកាលពីថ្ងៃពុធថា ក្នុងរយៈពេលប្រហែល ១២ម៉ោង ចាប់ពីថ្ងៃអង្គារ រហូតដល់ថ្ងៃពុធ ការវាយប្រហាររបស់អ៊ីស្រាអែលលើតំបន់ហ្កាហ្សា បានសម្លាប់ជនប៉ាឡេស្ទីនយ៉ាងហោច ១០៤នាក់ និងមនុស្សប្រហែល ២៥៣នាក់ផ្សេងទៀត បានរងរបួស ។

ព្រះអង្គ al-Thani មានមន្ទូលប្រាប់ក្រុមប្រឹក្សាទំនាក់ទំនងការបរទេសនៅទីក្រុងញូវយ៉កថា ក្រុមជីវពលហាម៉ាសប៉ាឡេស្ទីន ច្បាស់លាស់ថា ពួកគេចង់បោះបង់អភិបាលកិច្ចនៅតំបន់ហ្កាហ្សា ហើយកាតា កំពុងព្យាយាមជំរុញឲ្យពួកគេទទួលស្គាល់ថា ពួកគេត្រូវតែរំសាយអាវុធ ។

ទ្រង់បន្តថា អ្វីដែលបានកើតឡើងកាលពីថ្ងៃម្សិលមិញ គឺជាការបំពាន ហើយអ្វីដែលពួកទ្រង់រំពឹង ការបំពានដែលមាននៅទីនោះ នឹងត្រូវឆ្លើយតបចំពោះពួកទ្រង់ផងដែរ ប៉ុន្តែនេះជារឿងអកុសល ភាគីទាំង ២ត្រូវទទួលស្គាល់ការពិតថា បទឈប់បាញ់គួរតែចូលជាធរមាន ហើយពួកគេគួរតែគោរពកិច្ចព្រមព្រៀង ដែលត្រូវបានបង្កើតឡើង ។

ក្រុមការពារស៊ីវិលប៉ាឡេស្ទីននៅតំបន់ហ្កាហ្សា និយាយនៅក្នុងសេចក្តីថ្លែងការណ៍ថា ឧក្រិដ្ឋកម្មចងក្រងជាឯកសារនៃការវាយប្រហាររបស់អ៊ីស្រាអែល បន្ថែមពីលើបញ្ជីឈ្មោះយ៉ាងវែងនៃការបំពានលើមនុស្សរបស់ពួកយើង ហើយពួកគេទាមទារឲ្យមានបទឈប់បាញ់បន្ទាន់ និងគ្រប់ជ្រុងជ្រោយនៅទូទាំងតំបន់ហ្កាហ្សាស្រ្ទីប ។

ប្រភពវេជ្ជសាស្រ្តនិយាយប្រាប់កាសែត Al Jazeera ថា ការវាយប្រហារមួយក្នុងចំណោមការវាយប្រហារចុងក្រោយនេះ ត្រូវចំសំពត់តង់ជាជម្រករបស់មនុស្សជម្លៀសខ្លួននៅទីក្រុង Deir el-Balah ស្ថិតនៅភាគកណ្តាលហ្កាហ្សា ។ ការវាយប្រហារផ្សេងទៀតមានគោលដៅលើតំបន់ភាគខាងជើង និងតំបន់ភាគខាងត្បូងហ្កាហ្សា ។

កាលពីថ្ងៃពុធនោះដែរ ប្រធានាធិបតីសហរដ្ឋអាមេរិកលោក Donald Trump បាននិយាយការពារសកម្មភាពរបស់អ៊ីស្រាអែល ដោយលោកលើកឡើងពីសេចក្តីរាយការណ៍ថា ទាហានអ៊ីស្រាអែលវ័យ ៣៧ឆ្នាំម្នាក់ ត្រូវបានសម្លាប់នៅតំបន់ភាគខាងត្បូងហ្កាហ្សា ៕