ប្រភពសន្តិសុខប៉ាគីស្ថាន បានប្រាប់ឲ្យដឹងនៅថ្ងៃព្រហស្បតិ៍ (ទី៣០ ខែតុលា) នេះថា ប្រទេសប៉ាគីស្ថាន និងអាហ្វហ្គានីស្ថាន ទំនងជានឹងរៀបចំកិច្ចចរចាសន្តិភាពជុំមួយទៀត នៅទីក្រុងអ៊ីស្តង់ប៊ុល ប្រទេសទួរគី។

កិច្ចចរចាសម្របសម្រួលដោយប្រទេសកាតា និងទួរគី បានកើតឡើងបន្ទាប់ពីមានការប៉ះទង្គិចគ្នាបណ្ដាលឲ្យមានអ្នកស្លាប់ច្រើនបំផុត រវាងប្រទេសជិតខាងអាស៊ីខាងត្បូងទាំង២ ដែលជាលើកដំបូង គិតចាប់តាំងពីក្រុមតាលីបង់បានឡើងកាន់អំណាចក្នុងឆ្នាំ២០២១ នៅអាហ្វហ្គានីស្ថាន។

មនុស្សជាង ៧០នាក់ បានស្លាប់ និងរាប់រយនាក់បានរងរបួស នៅក្នុងអំពើហិង្សាដែលបានកើតឡើងបន្ទាប់ពីមានការបំផ្ទុះនៅទីក្រុងកាប៊ុល កាលពីថ្ងៃទី៩ ខែតុលា ដែលអាជ្ញាធរតាលីបង់បានដាក់ការទទួលខុសត្រូវទៅលើប៉ាគីស្ថាន។ ភាគីទាំង២ បានជួបប្រជុំគ្នានៅទីក្រុងអ៊ីស្តង់ប៊ុល ចាប់តាំងពីថ្ងៃសៅរ៍ចុងសប្ដាហ៍កន្លងទៅ ក្នុងគោលបំណងធានាឲ្យបានសន្តិភាព មុនពេលដែលទីក្រុងអ៊ីស្លាម៉ាបាដ បានបញ្ជាក់កាលពីថ្ងៃពុធថា ការចរចាបានដួលរលំហើយ។

ដោយបាននិយាយក្នុងលក្ខខណ្ឌមិនបញ្ចេញឈ្មោះ ដោយសារតែខ្លួនមិនត្រូវបានអនុញ្ញាតឲ្យពិភាក្សាប្រធានបទនេះជាសាធារណៈ ប្រភពនោះបានប្រាប់ថា៖ «តាមសំណើរបស់របបតាលីបង់អាហ្វហ្គានីស្ថាន កិច្ចចរចាមួយទៀត រវាងប៉ាគីស្ថាន និងទីក្រុងកាប៊ុល ទំនងជានឹងធ្វើឡើងនៅអ៊ីស្តង់ប៊ុល»។

ចំណែកទូរទស្សន៍រដ្ឋអាហ្វហ្គានីស្ថាន RTA ក៏បានរាយការណ៍នៅថ្ងៃព្រហស្បតិ៍នេះដែរថា៖ «ការចរចារដែលជាប់គាំងនេះ ត្រូវបានកំណត់ចាប់ផ្ដើមឡើងវិញនៅទីក្រុងអ៊ីស្តង់ប៊ុល ក្រោមការសម្របសម្រួលរបស់ប្រទេសទួរគី និងកាតា»៕