លោក Gyanendra Bhul គឺជាអ្នកនាំពាក្យអាជ្ញាធរអាកាសចរណ៍ស៊ីវិលនេប៉ាល់ និយាយថា ឧទ្ធម្ភាគចក្រឯកជនខ្នាតតូចមួយគ្រឿង ដែលហោះទៅកាន់ភ្នំ Lobuche ស្ថិតនៅជិតជំរំ Everest Base Camp ដើម្បីជួយសង្រ្គោះអ្នកដើរភ្នំជាប់ខ្លួន បានធ្លាក់កាលពីថ្ងៃពុធ ពេលដែលវាព្យាយាមចុះចត ។

   នៅក្នុងរូបភាពវីដេអូឃ្លីបឃើញឧទ្ធម្ភាគចក្រដែលរអិលលើព្រិលពេលចុះចត បានធ្លាក់នៅម្ខាង ។ អ្នកបើកបរឧទ្ធម្ភាគចក្រនៅរស់ ហើយក្រោយមកត្រូវបានជួយសង្រ្គោះ ។ គេនៅមិនទាន់ដឹងច្បាស់នោះទេថាតើ អ្នកឡើងភ្នំទាំងនោះ ត្រូវបានជួយសង្រ្គោះ ឬយ៉ាងណាទេ ។

 គួរឲ្យដឹងថាតំបន់ភ្នំ Everest នៅខាងប្រទេសនេប៉ាល់ និងប្រទេសចិន ត្រូវបានបិទសម្រាប់ភ្ញៀវទេសចរកាលពីថ្ងៃពុធ ក្រោយព្រិលធ្លាក់ខ្លាំង បង្កឡើងដោយសារខ្យល់ព្យុះស៊ីក្លូន ។

 ដោយមានក្រុមអ្នកដើរភ្នំ និងក្រុមអ្នកឡើងភ្នំរាប់ពាន់នាក់ តំបន់ជុំវិញភ្នំ Everest បានគ្របដណ្តប់ដោយព្រិល ចាប់តាំងពីថ្ងៃចន្ទរហូតមក ពេលដែលព្យុះស៊ីក្លូនបោកបក់ពីឆកសមុទ្របឹងហ្គាល់ បានវាយប្រហារប្រទេសឥណ្ឌា ធ្វើឲ្យមានព្រិលធ្លាក់ខ្លាំងជាលើកទី ២ នៅតំបន់ភ្នំហិម៉ាឡៃ ក្នុងខែនេះ ។

 ក្រុមអាជ្ញាធរនៅប្រទេសនេប៉ាល់ បានបញ្ឈប់ការដើរកម្សាន្តលេងលើភ្នំ តាមផ្លូវជាច្រើន ដោយសារភ្លៀងធ្លាក់នៅតាមផ្លូវទាបៗ និងព្រិលធ្លាក់ខ្លាំងនៅតាមផ្លូវខ្ពស់ៗ ហើយនិងជំរុញឲ្យក្រុមអ្នកឡើងភ្នំ មិនត្រូវប្រថុយជីវិតរបស់ពួកគេនោះឡើយ នៅតំបន់ភ្នំ Annapurna, Manaslu និង Dhaulagiri ដែលជាចំណុចកំពូលភ្នំខ្ពស់បំផុតរបស់ពិភពលោក ៕