វិមានក្រឹមឡាំង នៅថ្ងៃព្រហស្បតិ៍ (ទី៣០ ខែតុលា) នេះ បានប្រតិកម្មយ៉ាងប្រុងប្រយ័ត្ន ចំពោះការកត់សម្គាល់របស់លោកប្រធានាធិបតី Donald Trump អំពីការចាប់ផ្ដើមសាកល្បងអាវុធនុយក្លេអ៊ែរឡើងវិញដោយសហរដ្ឋអាមេរិក ដោយបញ្ជាក់ថា រុស្ស៊ីមិនបានសាកល្បងទេ ប៉ុន្តែថា ទីក្រុងមូស្គូនឹងអនុវត្តតាម ប្រសិនបើទីក្រុងវ៉ាស៊ីនតោនធ្វើដូច្នោះ។

គួរបញ្ជាក់ថា នៅថ្ងៃព្រហស្បតិ៍នេះ លោក Trump បានបញ្ជាឲ្យយោធាអាមេរិកចាប់ផ្ដើមសាកល្បងអាវុធនុយក្លេអ៊ែរឡើងវិញភ្លាមៗ បន្ទាប់ពីបានខានរយៈពេល ៣៣ឆ្នាំ ដោយការកត់សម្គាល់នេះកើតមានឡើងត្រឹមតែប៉ុន្មាននាទីប៉ុណ្ណោះមុនពេលចាប់ផ្តើមកិច្ចប្រជុំជាមួយប្រធានាធិបតីចិន លោក Xi Jinping។

លោក Trump បានសង្កត់ធ្ងន់ថា ដោយសារមាន «កម្មវិធីសាកល្បងរបស់ប្រទេសផ្សេង» សហរដ្ឋអាមេរិកនឹងចាប់ផ្តើមសាកល្បង «ផ្អែកលើមូលដ្ឋានស្មើភាពគ្នា»។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថា៖ «លោកប្រធានាធិបតី Trump បានលើកឡើងនៅក្នុងសេចក្តីថ្លែងការណ៍របស់លោកថា ប្រទេសផ្សេងទៀតកំពុងចូលរួមក្នុងការសាកល្បងអាវុធនុយក្លេអ៊ែរ។ រហូតមកដល់ពេលនេះ យើងមិនដឹងថា តើមានប្រទេសណាមួយកំពុងធ្វើសាកល្បងនោះទេ»។

លោកបានបន្ថែមថា ប្រទេសរុស្ស៊ីមិនបានទទួលការជូនដំណឹងជាមុនពីសហរដ្ឋអាមេរិក អំពីការផ្លាស់ប្តូរគោលជំហររបស់ទីក្រុងវ៉ាស៊ីនតោន ជុំវិញការសាកល្បងនុយក្លេអ៊ែរនោះទេ។ ហើយនៅពេលត្រូវបានសួរថា តើវិមានក្រឹមឡាំងយល់ថា ការប្រណាំងអាវុធនុយក្លេអ៊ែរថ្មី ត្រូវបានបង្កឡើងដោយការកត់សម្គាល់របស់លោក Trump ដែរ ឬយ៉ាងណានោះ លោក Peskov បានតបថា «មិនពិតនោះឡើយ»។

ជាមួយគ្នានេះ លោក Peskov បានគូសបញ្ជាក់ថា ការសាកល្បងមីស៊ីលតម្រង់គោលដៅ Burevestnik នៅថ្ងៃទី២១ ខែតុលា និងមីស៊ីលបាញ់ក្រោមទឹកដើរដោយថាមពលនុយក្លេអ៊ែរ Poseidon នៅថ្ងៃទី២៨ ខែតុលា គឺពិតជាមិនមែនជាការសាកល្បងអាវុធនុយក្លេអ៊ែរទេ៕