ក្រុមមន្រ្តីអ៊ីរ៉ាក់ ព្រមានពីការបាត់បង់បូជនីយស្ថាននៃអរិយធម៌មេសូប៉ូតាមីដែលមានប្រវត្តិរាប់ពាន់ឆ្នាំ ពេលដែលបណ្តាទីក្រុងបុរាណភាគខាងត្បូងអ៊ីរ៉ាក់ ប្រឈមនឹងការសឹករិចរិល ដោយសារបម្រែបម្រួលអាកាសធាតុ ។

អាកាសធាតុស្ងួតខ្លាំងកំពុងបង្កើនជាតិប្រៃក្នុងដី និងធ្វើឲ្យខូចខាតបូជនីយស្ថានប្រវត្តិសាស្រ្តនៅតាមប្រាសាទបាក់បែកក្នុងទីក្រុងនានាដូចជាទីក្រុង Ur ដែលជាទីកន្លែងកំណើតរបស់មន្រ្តីសង្ឃ Abraham និង Babylon និងធ្លាប់ជាអាណាចក្ររាជធានី ។

ពំនូកខ្សាច់ធ្វើឲ្យខូចផ្នែកខាងជើងនៃប្រាសាទ Ziggurat នៅទីក្រុង Ur គឺជាប្រាសាទពីរ៉ាមីតមានជណ្តើរធំដែលត្រូវបានឧទ្ទិសដល់ដល់អាទិទេព Nanna ។

លោក Abdullah Nasrallah គឺជាបុរាណវិទូនៅនាយកដ្ឋានបុរាណវិទ្យាស្ថិតក្នុងខេត្ត Dhi Qar ជាទីដែលទីក្រុង Ur ស្ថិតនៅ និយាយថា ខ្យល់បក់ និងពំនូកខ្សាច់នាំឲ្យមានការសឹករិចរិលនៅផ្នែកខាងជើងនៃតួប្រាសាទ ។

ទីសក្ការបូជានេះ ដែលជាសម្បត្តិបេតិកភណ្ឌពិភពលោករបស់អង្គការ UNESCO ស្ថិតនៅក្នុងចំណោមសំណង់ស្ថាបត្យកម្មអរិយធម៌មេសូប៉ូតាមីបុរាណត្រូវបានអភិរក្សល្អបំផុតដែលផ្តល់ជាទស្សនាទានដល់ការប្រារព្ធសាសនា និងទំនៀមទម្លាប់ពិសិដ្ឋនៃអាណាចក្រស៊ូមេរី ដែលស្ថិតនៅក្នុងចំណោមអរិយធម៌ដំបូងរបស់ពិភពលោកបានរីកចម្រើន ។

លោក Nasrallah និយាយថា ខណៈដែលស្រទាប់ទី ៣នៃប្រាសាទ Ziggurat បានខូចរួចទៅហើយនោះ ដោយសារអាកាសធាតុ និងបម្រែបម្រួលអាកាសធាតុ ការសឹករិចរិលឥឡូវបានចាប់ផ្តើមធ្វើឲ្យប៉ះពាល់ដល់ស្រទាប់ទី ២បន្ថែមទៀត ៕