នៅថ្ងៃព្រហស្បតិ៍នេះ គ្រួសារជម្លៀសខ្លួនប៉ាឡេស្ទីននៅទីក្រុង Khan Younis បានបង្ហាញការព្រួយបារម្ភខ្លាំងរបស់ពួកគេចំពោះការវិលត្រឡប់មករកសង្រ្គាមវិញនៅតំបន់ហ្កាហ្សា ដោយពួកគេរៀបរាប់ថា រៀងរាល់យប់ពួកគេលែងបានដេកពួនទៀតហើយ គ្រឿងផ្គត់ផ្គង់ក៏អស់ដែរ ខណៈក្មេងៗនាំគ្នាដឹកជញ្ជូនទឹកនៅជិតជំរំសំពត់តង់ ។

អ៊ីស្រាអែលនិយាយកាលពីថ្ងៃពុធថា ពួកគេនៅតែប្តេជ្ញាចិត្តចំពោះបទឈប់បាញ់គាំទ្រដោយសហរដ្ឋអាមេរិកនៅតំបន់ហ្កាហ្សា បើទោះបីជាមានការសងសឹករបស់ពួកគេចំពោះការស្លាប់របស់ទាហានអ៊ីស្រាអែលម្នាក់ជាមួយនឹងការទម្លាក់គ្រាប់បែកពេញមួយថ្ងៃដែលក្រុមអាជ្ញាធរសុខភាពហ្កាហ្សានិយាយថា បានសម្លាប់មនុស្ស ១០៤នាក់ ក៏ដោយ ។

លោក Fathi Al-Najjarគឺជាជនប៉ាឡេស្ទីនមួយរូបជម្លៀសខ្លួនចេញពីតំបន់ភាគខាងកើតទីក្រុង Khan Younis និយាយថា ពួកយើងខ្លាចសង្រ្គាមមួយទៀតផ្ទុះឡើងខ្លាំងណាស់ ពីព្រោះថា ពួកយើងមិនចង់បានសង្រ្គាមនោះទេ ។ ពួកយើងរងទុក្ខវេទនាច្រើនណាស់ អំឡុងពេលជម្លៀសខ្លួនរយៈពេល ២ឆ្នាំកន្លងមកនេះ ។ 

លោកបន្តថា ពួកយើងពុំដឹងថាគួរទៅកន្លែងណាទៀតនោះទេ ។ លោកពុំបានដេកពួនពេញមួយយប់ លោកឮសំឡេងយន្តទម្លាក់គ្រាប់បែក ហើយរាល់ពេលដែលមានការទម្លាក់គ្រាប់បែក មានមនុស្ស ១០០នាក់ បានស្លាប់ គ្មានរណាម្នាក់ស្វែងរកពួកយើង ជួយពួកយើងនោះទេ ពិភពលោកទាំងមូលបានត្រឹមតែឱបដៃឈរមើលប៉ុណ្ណោះ ។

ចំណែកឯលោក Mohmmed Al-Sheikhដែលជាជនប៉ាឡេស្ទីនជម្លៀសខ្លួនមួយរូបទៀតនិយាយដែរថា ស្ថានភាពពិតជាលំបាកខ្លាំងណាស់ ។ សង្រ្គាមនៅតែបន្ត ហើយពួកយើងមិនសង្ឃឹមថា វានឹងបញ្ចប់ពីលក្ខខណ្ឌដែលពួកយើងកំពុងមើលឃើញជីវិតដែលពួកយើងកំពុងរស់នៅបែបនេះនោះទេ ។

ការសម្លាប់ទាហានអ៊ីស្រាអែលនៅតំបន់ហ្កាហ្សាកាលពីថ្ងៃអង្គារ បង្កឲ្យមានការកើនឡើងភាពតានតឹងដ៏អាក្រក់បំផុត ចាប់តាំងពីបទឈប់បាញគាំទ្រដោយប្រធានាធិបតីសហរដ្ឋអាមេរិកលោក Donald Trump បានចូលជាធរមានកាលពីថ្ងៃទី ១០ ខែតុលា ក្រោយសង្រ្គាមអស់រយៈពេល ២ឆ្នាំ ៕