ការតវ៉ាដោយហិង្សាយ៉ាងកម្រោល បានផ្ទុះឡើងនៅជិតទីប្រជុំជន Namanga របស់ប្រទេសកេនយ៉ា ជាប់ព្រំដែនជាមួយប្រទេសតង់ហ្សានី កាលពីថ្ងៃព្រហស្បតិ៍ (៣០ តុលា) ខណៈភាពចលាចលពីការបោះឆ្នោតដែលមានជម្លោះរបស់តង់ហ្សានី បានរីករាលដាលពាសពេញព្រំដែន។

នៅតង់ហ្សានី សាក្សីបាននិយាយថា នគរបាលបានបាញ់ឧស្ម័នបង្ហូរទឹកភ្នែក និងកាំភ្លើង ដើម្បីបំបែកហ្វូងបាតុករ ដែលចេញតវ៉ាជាថ្មីនៅថ្ងៃព្រហស្បតិ៍ បន្ទាប់ពីការបោះឆ្នោតសកល។ ការតវ៉ាបានផ្ទុះឡើងដំបូងកាលពីថ្ងៃពុធ ក្នុងរដ្ឋធានីពាណិជ្ជកម្ម ដាអេសសាឡឹម និងទីក្រុងផ្សេងទៀតរបស់តង់ហ្សានី ដោយសារការមិនពេញចិត្តនឹងរដ្ឋាភិបាលរបស់ប្រធានាធិបតី លោកស្រី Samia Suluhu Hassan។

នគរបាលតង់ហ្សានីបានដាក់បម្រាមគោចរពេញមួយយប់ក្នុងទីក្រុងដាអេសសាឡឹម ដែលមានប្រជាជនជាង ៧លាននាក់ បន្ទាប់ពីការិយាល័យរដ្ឋាភិបាល និងអគារផ្សេងទៀតត្រូវដុតបំផ្លាញដោយបាតុករ។ បណ្ដាញអ៊ីនធឺណិត ដែលត្រូវបានរំខានក្នុងអំឡុងពេលបោះឆ្នោតថ្ងៃពុធ ក៏ហាក់ដូចជាត្រលប់មកវិញជាបន្តបន្ទាប់នៅថ្ងៃព្រហស្បតិ៍។

នៅទីក្រុងជាយដែនរបស់កេនយ៉ាវិញ យុវជនបានប្រមូលផ្តុំគ្នាជាក្រុម ដោយដុតកម្ទេច និងហែកផ្ទាំងផ្សាយយុទ្ធនាការរបស់ប្រធានាធិបតីតង់ហ្សានីនៅជិតច្រកព្រំដែនកេនយ៉ា។ ទិដ្ឋភាពដ៏វឹកវរក៏បានផ្ទុះឡើង ដោយនគរបាលកេនយ៉ាបានប្រើគ្រាប់បែកផ្សែង ឧស្ម័នបង្ហូរទឹកភ្នែក និងគ្រាប់រំសេវលើក្រុមបាតុករ ដែលបានរត់ប្រសាចដោយភាពភ័យខ្លាចពាសពេញដងផ្លូវ៕