រាជរដ្ឋាភិបាលកម្ពុជាចាត់ទុកកំណើនបៃតង គឺជាយុទ្ធសាស្រ្តនៃការធ្វើពិពិធកម្មសេដ្ឋកិច្ចកម្ពុជា និងជាក្បាលម៉ាស៊ីនថ្មីនៃកំណើន សេដ្ឋកិច្ច និងការបង្វែរពីការប្តេជ្ញាចិត្តដែលមាន គោលនយោបាយ និងយុទ្ធសាស្រ្ត ទៅជាការអនុវត្តជាក់ស្តែង ដោយសម្រេចបានលទ្ធផល គួរឱ្យកត់សម្គាល់។

ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការរដ្ឋមន្ត្រី ទទួលបន្ទុកទីស្តីការគណៈរដ្ឋមន្ត្រី តំណាងដ៏ខ្ពង់ខ្ពស់សម្ដេចមហាបវរ ធិបតី ហ៊ុន ម៉ាណែត នាយករដ្ឋមន្រ្តី នៅក្នុងពិធីបើកកិច្ចប្រជុំកំពូលបៃតង និងចីរភាពសកលឆ្នាំ២០២៥ ក្រោមប្រធានបទ «ការអភិវឌ្ឍ បៃតងនិងឱកាស» និងប្រធានបទរួម «ការកសាងអនាគត និងការស្ថាបនាពិភពលោកប្រកបដោយចីរភាព» នៅថ្ងៃទី៣០ ខែតុលា ឆ្នាំ២០២៥នេះ ឯកឧត្តមបានគូសបញ្ជាក់ពីការប្តេជ្ញាចិត្តដ៏យូរអង្វែងរបស់កម្ពុជា ក្នុងការកសាងអនាគតប្រកបដោយចីរភាព និងបានលើក ថា កំណើនសេដ្ឋកិច្ចបែបប្រពៃណី បានបង្កជាការប៉ះពាល់បរិស្ថាន ដែលកំពុងគំរាមកំហែងស្ថិរភាពសកល ហើយកម្ពុជាជាប្រទេសងាយ រងគ្រោះបំផុតមួយនៅអាស៊ាន ប្រឈមនឹងទឹកជំនន់ គ្រោះរាំងស្ងួត និងការបាត់បង់ជីវៈចម្រុះជាដើម។

ឯកឧត្តមឧបនាយករដ្ឋមន្ត្រី លើកឡើងថា ដើម្បីដោះស្រាយបញ្ហាប្រឈមនេះ រាជរដ្ឋាភិបាលនីតិកាលទី៧ បានដាក់ចេញនូវយុទ្ធ សាស្ត្របញ្ចកោណ-ដំណាក់កាលទី១ ដោយផ្តោតលើកំណើនបៃតងរួមមាន យុទ្ធសាស្ត្ររយៈពេលវែងសម្រាប់អព្យាក្រឹតកាបូន ដើម្បីឈាន ទៅអព្យាក្រឹតកាបូននៅឆ្នាំ២០៥០, ផែនទីបង្ហាញផ្លូវអភិវឌ្ឍន៍ជាតិបៃតង ២០២១-២០៣៥, យុទ្ធសាស្រ្តចក្រាវិស័យបរិស្ថាន ២០២៣-២០២៨ និងផែនការយុទ្ធសាស្ត្រឆ្លើយតបនឹងការប្រែប្រួលអាកាសធាតុកម្ពុជា ២០២៤-២០៣៣។ ជារួម, រាជរដ្ឋាភិបាលកម្ពុជាចាត់ទុក កំណើនបៃតង គឺជាយុទ្ធសាស្រ្តនៃការធ្វើពិពិធកម្មសេដ្ឋកិច្ចកម្ពុជា និងជាក្បាលម៉ាស៊ីនថ្មីនៃកំណើនសេដ្ឋកិច្ច។

ជាក់ស្តែងកម្ពុជាបានបង្កើតតំបន់សេដ្ឋកិច្ចពិសេសបៃតងនៅខេត្តកោះកុង ដែលបានដាក់បញ្ចូលនូវថាមពលកកើតឡើងវិញ ការ គ្រប់គ្រងកាកសំណល់ និងគោលការណ៍ចក្រា និងការបង្កើតនូវព្រលានយន្តហោះអន្តរជាតិសម្តេចតេជោ ដែលបំពាក់នូវប្រព័ន្ធប្រសិទ្ធភាព ថាមពល ស្ថាបត្យកម្មសំណង់ដែលមានលក្ខណៈភាតរៈបរិស្ថាន និងការគ្រប់គ្រងកាកសំណល់បែបទំនើប ព្រមទាំងការជំរុញការវិនិយោគ ថាមពលកកើតឡើងវិញ ដែលធ្វើឱ្យថាមពលនេះមានចំណែករហូតដល់ ៦២% នៅក្នុងការផ្គត់ផ្គង់ថាមពលក្នុងស្រុកសរុបជាដើម។

ដើម្បីប្រែក្លាយការប្តេជ្ញាចិត្តទៅជាការអនុវត្តមានប្រសិទ្ធភាព ឯកឧត្តមឧបនាយករដ្ឋមន្រ្តី, បានផ្តល់នូវអនុសាសន៍ជាច្រើនចំណុច រួមមាន៖ សម្រួលនីតិវិធីនៃការទទួលបានហិរញ្ញប្បទាន អាកាសធាតុសម្រាប់ប្រទេសកំពុងអភិវឌ្ឍ, រៀបចំផែនការដែលមានលក្ខណៈ បុរេសកម្ម ដើម្បីឆ្លើយតបនឹងតម្រូវការហិរញ្ញវត្ថុសម្រាប់អន្តរកាលថាមពល និងការកាត់បន្ថយការបំភាយឧស្ម័ន, កាត់បន្ថយអត្រាការប្រាក់ ហិរញ្ញប្បទាន, ជំរុញការផ្ទេរបច្ចេកវិទ្យា, ជៀសវាង green protectionism, វិនិយោគលើការកសាងសមត្ថភាព, ដឹកនាំដោយគំរូដោយ ប្រទេសបំភាយឧស្ម័នធំៗ ត្រូវចាត់វិធានការខ្លាំងក្លាជាងមុន ដោយមិនដាក់ទោសលើប្រទេសកំពុងអភិវឌ្ឍ, និងជំរុញឱ្យមានសាមគ្គីភាព តាមរយៈការពង្រឹងកិច្ចសហប្រតិបត្តិការឆ្លងព្រំដែន រវាងរដ្ឋាភិបាល ធុរកិច្ច និងស្ថាប័នស្រាវជ្រាវ ដើម្បីចែករំលែកការអនុវត្តល្អបំផុត និង ការច្នៃប្រឌិត៕ អត្ថបទ៖ សុន រ៉ាឌី