ក្រុមមន្ត្រីអ៊ុយក្រែន បាននិយាយកាលពីថ្ងៃព្រហស្បតិ៍ (៣០ តុលា) ថា រុស្ស៊ី បានបើកការវាយប្រហារយានដ្រូន និងមីស៊ីលទ្រង់ទ្រាយធំលើហេដ្ឋារចនាសម្ព័ន្ធថាមពលរបស់អ៊ុយក្រែន និងគោលដៅផ្សេងទៀត ដោយបង្ខំឱ្យប៉ះពាល់ដល់ចរន្តអគ្គិសនីទូទាំងប្រទេស និងបានសម្លាប់មនុស្សយ៉ាងតិច ៧នាក់ រួមទាំងក្មេងស្រីអាយុ ៧ឆ្នាំម្នាក់ ហើយមនុស្សជាច្រើនរងរបួស។

នាយករដ្ឋមន្ត្រីអ៊ុយក្រែន លោកស្រី Yulia Svyrydenko បានចោទទីក្រុងមូស្គូ ថាដាក់គោលដៅលើប្រជាជនអ៊ុយក្រែន និងបណ្ដាញផ្គត់ផ្គង់ថាមពល ក្នុងពេលរដូវរងាដ៏កំណាចជិតមកដល់។ ការវាយប្រហារនេះជារលកចុងក្រោយបង្អស់នៃប្រតិបត្តិការផ្លូវអាកាសរបស់រុស្ស៊ី ដើម្បីដាក់សម្ពាធលើបណ្តាញអគ្គិសនីអ៊ុយក្រែន។

លោកប្រធានាធិបតីអ៊ុយក្រែន Volodymyr Zelenskyy បាននិយាយថា រុស្ស៊ីបានបាញ់យានដ្រូនជាង ៦៥០គ្រឿង និងមីស៊ីលជាង ៥០គ្រាប់ ក្នុងការវាយប្រហារនេះ។ យោធាប៉ូឡូញ បាននិយាយថា ខ្លួនបានប្រុងប្រៀបយន្តហោះចម្បាំងរបស់ប៉ូឡូញ និងសម្ព័ន្ធមិត្តណាតូ ដើម្បីជាវិធានការបង្ការជាមុន ដោយសារតែការវាយប្រហាររបស់រុស្ស៊ី លើទឹកដីអ៊ុយក្រែន។

សារព័ត៌មាន AP និយាយថា ការវាយប្រហារកាន់តែខ្លាំងឡើងជាច្រើនខែរបស់រុស្ស៊ី មានគោលបំណងបំផ្លាញសីលធម៌របស់អ៊ុយក្រែន ក៏ដូចជាបង្អាក់ការផលិតសព្វាវុធ និងសកម្មភាពដែលទាក់ទងនឹងសង្គ្រាមផ្សេងទៀត រយៈពេលជិត ៤ឆ្នាំបន្ទាប់ពីប្រតិបត្តិការយោធាពិសេសរបស់រុស្ស៊ី លើអ្នកជិតខាងរបស់ខ្លួន៕