​​បួ​គី​ណា​ហ្វា​សូ​៖ របប​យោធា​ដែល​បាន​ដណ្តើម​ឡើងកាន់​អំណាច​ក្នុងប្រទេស​បួ​គី​ណា​ហ្វា​សូ​កាលពី​ខែ​មុន បន្ទាប់ពី​បាន​ទម្លាក់​ប្រធានាធិ​ប​តី​ជាប់ឆ្នោត​តាមបែប​លទ្ធិប្រជាធិបតេយ្យ​របស់​ប្រទេស បានរៀបចំ​ពិធីតែង​តាំងមេបញ្ជាការ​ថ្មីនៃ​កងកម្លាំងប្រដាប់អាវុធនៅក្នុង​រដ្ឋធានី Ouagadougou កាលពី​ថ្ងៃ​ពុធ​។

​លោក David Kabre អាយុ ៥៤​ឆ្នាំ​ជា​អតីត​រដ្ឋមន្ត្រី​ក្រសួង​កីឡាត្រូវបានតែងតាំង​ជា​អគ្គសេនាធិការ ដោយ​មេដឹកនាំ​រដ្ឋប្រហារ​លោក Paul Henri Sandaogo Damiba។​ ​មេដឹកនាំ​យោធា​របស់​ប្រទេស​បាន​ឡើង​កាន់​អំណាច​ដោយ​សន្យាថា នឹង​ទប់ស្កាត់​អំពើ​ហិង្សារបស់ក្រុម​ជី​ហាដដែល​បានសម្លាប់​មនុស្ស​រាប់ពាន់​នាក់ និង​ជិត ១.៥លាន​នាក់​ផ្លាស់​ទីលំនៅ​។​ ​ប្រទេស​បួ​គី​ណាហ្វា​សូត្រូវបាន​ផ្អាក​ពី​សហគមន៍​សេដ្ឋកិច្ចនៃ​រដ្ឋ​អាហ្វ្រិក​ខាងលិច (ECOWAS) និង​ប្លុក​តំបន់​សហភាព​អាហ្វ្រិក បន្ទាប់ពី​ទាហាន​ប៉ះ​បោរបាន​ផ្តួលរំលំ​ប្រធានាធិបតីលោក Roch Marc Christian Kabore ហើយ​រំលាយ​រដ្ឋាភិបាល និង​សភាជាតិដោយ​ព្យួរ​រដ្ឋធម្មនុញ្ញ​។ ​កាលពី​សប្តាហ៍​មុន មេដឹកនាំ​សហគមន៍សេដ្ឋកិច្ច​នៃ​រដ្ឋ​អាហ្វ្រិក​ខាងលិចបាន​បើក​កិច្ចប្រជុំ​កំពូល ប៉ុន្តែ​បាន​បដិសេធ​មិន​ដាក់ទណ្ឌកម្ម​លើ​របប​យោធា​ថ្មី ជំនួស​មកវិញ​ដោយ​អំពាវនាវ​ឱ្យ​មេដឹកនាំ​ថ្មីស្នើ​កាលបរិច្ឆេទ​ច្បាស់លាស់ សម្រាប់​ការផ្ទេរ​ត្រឡប់​ប្រទេស​ទៅ​ឲ្យ​ការគ្រប់គ្រង​តាមបែប​លទ្ធិប្រជាធិបតេយ្យ​វិញ៕

អត្ថបទ៖ ប៊ុនថន