រដ្ឋមន្ត្រីការបរទេសអ៊ុយក្រែន លោក Andrii Sybiha បាននិយាយថា ក្នុងរយៈពេលប៉ុន្មានខែថ្មីៗនេះ រុស្ស៊ីបានវាយប្រហារអ៊ុយក្រែនដោយមីស៊ីលតម្រង់គោលដៅ ដែលការអភិវឌ្ឍដោយសម្ងាត់របស់វា បានជំរុញឲ្យលោក Donald Trump បោះបង់ចោលកិច្ចព្រមព្រៀងគ្រប់គ្រងអាវុធនុយក្លេអ៊ែរជាមួយទីក្រុងមូស្គូ ក្នុងអាណត្តិដំបូងរបស់លោកជាប្រធានាធិបតីសហរដ្ឋអាមេរិក។

ការអត្ថាធិប្បាយរបស់លោក Sybiha គឺជាការបញ្ជាក់ដំបូង ដែលថា រុស្ស៊ីបានប្រើប្រាស់មីស៊ីល 9M729 បាញ់ពីដី សម្រាប់ការធ្វើសង្គ្រាម ពោលគឺទាំងនៅអ៊ុយក្រែន ឬកន្លែងផ្សេងទៀត។

មន្ត្រីជាន់ខ្ពស់អ៊ុយក្រែនលំដាប់ទី ២ រូបនេះ បានប្រាប់សារព័ត៌មាន Reuters ថា រុស្ស៊ីបានបាញ់មីស៊ីលទៅអ៊ុយក្រែន ២៣ដង គិតចាប់តាំងពីខែសីហាមក។ ហើយជាមួយគ្នានេះ ប្រភពបានឲ្យដឹងថា ប្រទេសអ៊ុយក្រែនក៏បានកត់ត្រាការបាញ់មីស៊ីល 9M729 ២លើក ដោយរុស្ស៊ី កាលពីឆ្នាំ២០២២។

ក្រសួងការពារជាតិរុស្ស៊ី មិនបានឆ្លើយតបភ្លាមៗនោះឡើយ ចំពោះសំណើជាលាយលក្ខណ៍អក្សរ ដើម្បីសុំការអត្ថាធិប្បាយ។ 

មីស៊ីល 9M729 បាននាំឲ្យសហរដ្ឋអាមេរិកដកខ្លួនចេញពីសន្ធិសញ្ញាកងកម្លាំងនុយក្លេអ៊ែរចម្ងាយមធ្យម (INF) ក្នុងឆ្នាំ២០១៩។ ទីក្រុងវ៉ាស៊ីនតោន បានឲ្យដឹងថា មីស៊ីលនេះ គឺបំពានលើសន្ធិសញ្ញានេះ ហើយអាចហោះបានឆ្ងាយហួសពីដែនកំណត់ ៥០០គីឡូម៉ែត្រ ទោះបីជារុស្ស៊ីបានបដិសេធការលើកឡើងនេះក៏ដោយ។ ហើយបើតាមប្រភពយោធាមួយរូប បានឲ្យដឹងថា មីស៊ីល 9M729 ដែលបាញ់ដោយរុស្ស៊ី កាលពីថ្ងៃទី៥ ខែតុលា បានហោះចម្ងាយ ១.២០០គីឡូម៉ែត្រ រហូតដល់វាយប្រហារគោលដៅ នៅអ៊ុយក្រែន។

នៅក្នុងសុន្ទរកថាជាលាយលក្ខណ៍អក្សរ លោក Sybiha បានបញ្ជាក់ថា៖ «ការប្រើប្រាស់របស់រុស្ស៊ីនូវមីស៊ីល 9M729 ដែលត្រូវបានហាមឃាត់ដោយសន្ធិសញ្ញា INF ប្រឆាំងនឹងអ៊ុយក្រែន ក្នុងរយៈពេលប៉ុន្មានខែកន្លងមកនេះ បង្ហាញពីការមិនគោរពរបស់លោកប្រធានាធិបតី Vladimir Putin ចំពោះសហរដ្ឋអាមេរិក និងកិច្ចប្រឹងប្រែងការទូតរបស់លោកប្រធានាធិបតី Trump ដើម្បីបញ្ចប់សង្រ្គាមរបស់រុស្ស៊ីលើអ៊ុយក្រែន»៕