អ៊ុយក្រែន៖ មន្ត្រីយោធាអ៊ុយក្រែនកាលពីថ្ងៃពុធបានស្នើសុំជំនួយសំខាន់ រួមទាំងប្រព័ន្ធការពារដែនអាកាសរឹងមាំដើម្បីប្រឆាំងនឹងការលុកលុយដ៏មានសក្ដានុពលរបស់រុស្ស៊ី ហើយបានចោទប្រកាន់ទីក្រុងម៉ូស្គូថា កំពុងធ្វើសង្គ្រាមព័ត៌មានដ៏មានឥទ្ធិពល។ ឧត្ដមសេនីយ៍លោក Oleksandr Pavliuk បាននិយាយថា ប្រព័ន្ធការពារដែនអាកាសរឹងមាំគឺចាំបាច់ ព្រោះគោលបំណងចម្បងរបស់ប្រទេសរុស្ស៊ីគឺដែនអាកាស និងមីស៊ីល។
លោកឧត្ដមសេនីយ៍បាននិយាយបែបនេះក្នុងអំឡុងដំណើរទស្សនកិច្ចទៅកាន់ទីក្រុង Avdiivka ដែលគ្រប់គ្រងដោយរដ្ឋាភិបាលអ៊ុយក្រែននៅតំបន់ Donetsk ភាគខាងកើតជាសមរភូមិធំក្នុងអំឡុងជម្លោះឆ្នាំ២០១៤ ដើម្បីពិនិត្យកងទ័ពរួមគ្នាជាមួយអនុរដ្ឋមន្ត្រីការពារជាតិអ៊ុយក្រែនលោក Hanna Maliar។ លោក Maliar និយាយថា ខណៈមានទាហានរុស្ស៊ីនៅទីនោះ ហើយសម្ភារៈយោធាត្រូវបានដាក់ពង្រាយនៅតាមព្រំដែនរបស់ប្រទេស ប៉ុន្តែក្រុមវាយប្រហារនៅមិនទាន់បានបង្កើតនៅឡើយ។
មេបញ្ជាការកងទ័ពជើងគោកអ៊ុយក្រែនលោក Oleksandr Syrskyi និយាយថា អ៊ុយក្រែននឹងធ្វើសមយុទ្ធនៅជិតទឹកដីរុស្ស៊ី និងបេឡារុស្ស ដើម្បីឆ្លើយតបទៅនឹងការបង្កើនកងទ័ព។ មន្ត្រីសហរដ្ឋអាមេរិកនិយាយថា ជាមួយនឹងកងទ័ពជាង ១០ម៉ឺននាក់នៅជិតព្រំដែនភាគខាងកើត និងខាងជើងប្រទេសអ៊ុយក្រែន ការគំរាមឈ្លានពានរបស់រុស្ស៊ីគឺធ្ងន់ធ្ងរជាងអ្វីដែលបានកើតមានឡើង ក្នុងអំឡុងពេលប៉ុន្មានឆ្នាំនៃការប្រយុទ្ធគ្នារវាងក្រុមឧទ្ទាមគាំទ្រដោយរុស្ស៊ី និងកងកម្លាំងអ៊ុយក្រែន៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
