អ្នកនាំពាក្យទីក្រុង Castrop-Rauxel និយាយនៅថ្ងៃសុក្រនេះថា មនុស្ស ៤នាក់ បានរងរបួស នៅក្នុងហេតុការណ៍អគ្គិភ័យនៅរោងជាងទល់មុខស្ថានីយ៍ហ្គាស ស្ថិតនៅភាគខាងលិចប្រទេសអាល្លឺម៉ង់ ។

ចំណែកឯអ្នកនាំពាក្យនគរបាលនិយាយថា មនុស្សជាច្រើននាក់រងរបួស ប៉ុន្តែលោកពុំបានបញ្ជាក់ពីចំនួនពិតប្រាកដនោះទេ ។

នគរបាលនិយាយថា ការផ្ទុះមួយត្រូវបានឮចេញពីទីតាំងមួយនេះ ស្ថិតនៅតំបន់ឧស្សាហកម្ម ដោយមានសំណុំផ្សែងយ៉ាងក្រាស់ផុសលើអាកាស ហើយក្រុមភ្នាក់ងារពន្លត់អគ្គិភ័យ ត្រូវបានបញ្ជូនទៅកាន់កន្លែងកើតហេតុ ។

ដោយឡែក មូលហេតុបណ្តាលឲ្យអគ្គិភ័យនេះឡើង គេនៅពុំទាន់ដឹងច្បាស់ភ្លាមៗនោះទេ ។ ឧទ្ធម្ភាគចក្រ ២គ្រឿង ត្រូវបានបញ្ជូនទៅដឹកអ្នករងរបួសធ្ងន់ទៅកាន់មន្ទីរពេទ្យ ។ អ្នកស្រុកត្រូវបានណែនាំឲ្យបិទទ្វារ-បង្អួចផ្ទះ ខណៈផ្សែងនៅតែបន្តហុយ ។

ស្ថិតនៅភាគខាងលិចទីក្រុង Dortmund ទីក្រុង Castrop-Rauxel គឺជាផ្នែកមួយនៃតំបន់ Ruhr របស់អាល្លឺម៉ង់ ដែលជាតំបន់ជាយក្រុងមានមនុស្សរស់នៅច្រើនកុះករ និងជាអតីតតំបន់ឧស្សាហកម្មដ៏សំខាន់នៅភាគខាងជើងទីក្រុង Dusseldorf ៕