ទូកក្តោងដឹកទំនិញធំបំផុតរបស់ពិភពលោក បានបញ្ចប់ការធ្វើដំណើរឆ្លងកាត់មហាសមុទ្រអាត្លង់ទិកលើកដំបូងកាលពីថ្ងៃព្រហស្បតិ៍ ។

កំពង់ផែ Baltimore បានស្វាគមន៍ទូកក្តោង Neoliner Origin គឺជាទូកក្តោងមានបណ្តោយប្រវែង ១៣៧ម៉ែត្រ ដោយមានដឹកទំនិញជាច្រើន ដូចជា រថយន្ត Renault គ្រឿងចក្រ ស្រាបារាំង និងទំនិញផ្សេងៗជាច្រើនមុខទៀត ។

ដំបូងឡើយទូកមួយគ្រឿងនេះ បានឈប់សំចតនៅដែនដី Saint Pierre និង Miquelon ដែលជាដែនដីបរទេសរបស់បារាំង នៅជិតប្រទេសកាណាដា ។

ទោះបីជាយ៉ាងណាកដ៏ដោយ ក្រុមនាវិកទូកក្តោង Neoliner Origin បានពឹងផ្អែកដោយផ្នែកលើម៉ាស៊ីនរបស់វា សម្រាប់ការធ្វើដំណើរឆ្លងកាត់មហាសមុទ្រអាត្លង់ទិក ក្រោយព្យុះបានធ្វើឲ្យខូចក្តោងក្រោយរបស់វា ។

ការរចនាទូកក្តោង Neoliner Originនេះឡើង មានគោលបំណងកាត់បន្ថយការបំភាយឧស្ម័នចំនួន ៨០ភាគរយដល់ ៩០ភាគរយ ធៀបនឹងនាវាដឹកទំនិញប្រើប្រេងម៉ាស៊ូតធម្មតា ។

លោក Jean Zanuttini គឺជាប្រធានប្រតិបត្តិក្រុមហ៊ុន Neoline ដែលជាម្ចាស់ទូកក្តោងបារាំងមួយគ្រឿងនេះ និយាយថា ពួកយើងបានចំណាយពេល ៦ខែ ទើបទទួលបានការយល់ដឹងកាន់តែច្បាស់ពីដំណើរការរបស់វា ។

លោកបន្តថា ការជំរុញដោយកម្លាំងខ្យល់ គួរឲ្យចាប់អារម្មណ៍ខ្លាំងណាស់សម្រាប់ទូកក្តោងមួយគ្រឿងនេះ ពីព្រោះថា វាគឺជាថាមពលសេរីមាននៅគ្រប់ទីកន្លែងទាំងអស់ ៕