ភ្នំពេញ៖ ក្រោមកិច្ចសហប្រតិបត្តិការ រវាងអង្គការសហប្រជាជាតិប្រចាំនៅកម្ពុជា និងមានការចូលរួមសហការឧបត្ថម របស់ក្រុមហ៊ុន តូយ៉ូតា (ខេមបូឌា) ក្រុមហ៊ុន អ៊ីអន ម៉ល ខេមបូឌា បានរៀបចំកម្មវិធី «តោះចូលរួមសកម្មភាពដើម្បី អេស ឌី ជី» ដែលប្រព្រឹត្តទៅនៅផ្សារទំនើប អ៊ីអន ម៉ល មានជ័យ (អ៊ីអន៣)។

កម្មវិធី «តោះចូលរួមសកម្មភាពដើម្បី អេស ឌី ជី» នេះ មានរយៈពេល ៣ថ្ងៃ ចាប់ពីថ្ងៃទី៣១ ខែតុលា ដល់ថ្ងៃទី២ ខែវិច្ឆិកា ឆ្នាំ២០២៥ នៅផ្សារទំនើប អ៊ីអន ម៉ល មានជ័យ (អ៊ីអន៣) ដែលរៀបចំឡើងដើម្បីឱ្យភាគីពាក់ព័ន្ធទាំងអស់រួមគ្នាស្វែងរកដំណោះស្រាយប្រកបដោយភាពច្នៃប្រឌិត ជម្រុញកិច្ចសហប្រតិបត្តិការប្រកបដោយអត្ថន័យ ដោយផ្តល់សិទ្ធិអំណាចដល់បុគ្គល និងអង្គការនានាដើម្បីធ្វើសកម្មភាពរួមគ្នាសម្រាប់អនាគតដ៏ល្អប្រសើរទៅដល់មនុស្សជំនាន់ក្រោយ។ ជាពិសេស ដើម្បីបង្កើតវេទិកាមួយសម្រាប់បុគ្គល អាជីវកម្ម និងសហគមន៍ ដើម្បីចូលរួមសកម្មភាពដែលរួមចំណែកដល់ការសម្រេចបាននូវគោលដៅអភិវឌ្ឍន៍ប្រកបដោយចីរភាពនៅពេលអនាគត។

 នេះជាលើកទី៣ហើយ ដែលរៀបចំព្រឹត្តការណ៍នេះឡើង ក្នុងគោលបំណងបង្កើនមិត្តភាព រវាងស្ថាប័នរដ្ឋ ក្រុមហ៊ុនឯកជន ស្ថាប័នអប់រំ ក្រុមហ៊ុនធុរជន យុវជន និងសហគម ដើម្បីជម្រុញវឌ្ឍនភាពរបស់ប្រទេសកម្ពុជាឆ្ពោះទៅរកគោលដៅអភិវឌ្ឍន៍ប្រកបដោយចីរភាព។

មាតិកាសំខាន់ៗនៃកម្មវិធីនេះ មានដូចជា បរិយាបន្នសម្រាប់ក្រុមអ្នកស្រលាញ់ភេទដូចគ្នានៅកន្លែងធ្វើការ, ការអប់រំសម្រាប់អនាគត ផ្តោតលើជំនាញសំខាន់ៗ និងសម្លៀកបំពាក់សម្រាប់អនាគត ដែលផ្តោតទៅលើ តើស្ទីលសម្លៀកបំពាក់អាចមានចីរភាពទ?។ ក្រៅពីនេះ ក៏មានរៀបចំជាវេទិកាស្តីអំពី អេស ឌី ជី ការសម្តែងសិល្បៈ ស្តង់ពិព័រណ៍ និងកម្មវិធីកម្សាន្តផ្សេងៗជាច្រើនថែមទៀត៕អត្ថបទ៖ ឈិត បូរ៉ាវី