នាយករដ្ឋមន្ត្រីប្រទេសកាណាដា លោក Mark Carney បានយល់ព្រមធ្វើទស្សនកិច្ចទៅកាន់ប្រទេសចិន បន្ទាប់ពីបានជួបជាមួយប្រធានាធិបតីចិន លោក Xi Jinping កាលពីថ្ងៃសុក្រ ទី ៣១ ខែតុលា ក្នុងជំនួប ដែលអាចជាចំណុចរបត់មួយ ប៉ុន្តែពុំបានផ្តល់ការទម្លាយភាពទាល់ច្រកស្តីពីពាណិជ្ជកម្មនោះទេ។

លោក Xi និងលោក Carney បានជួបគ្នានៅក្រៅវេទិកាកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) នៅទីក្រុង Gyeongju ប្រទេសកូរ៉េខាងត្បូង ជាផ្នែកមួយនៃដំណើរទស្សនកិច្ចនៅអាស៊ីរបស់ លោក Carney ក្នុងគោលបំណងពង្រឹងទំនាក់ទំនងពាណិជ្ជកម្ម និងសន្តិសុខក្នុងតំបន់នេះឱ្យកាន់តែស៊ីជម្រៅ ខណៈប្រទេសកាណាដាខិតខំកាត់បន្ថយការពឹងផ្អែករបស់ខ្លួនលើសហរដ្ឋអាមេរិក។

លោក Xi បានប្រាប់ លោក Carney ថា ប្រទេសចិនឱ្យតម្លៃលើការត្រៀមខ្លួនរបស់ប្រទេសកាណាដា ក្នុងការធ្វើឱ្យប្រសើរឡើងនូវទំនាក់ទំនងទ្វេភាគី នេះបើយោងតាមការផ្សាយរបស់ទូរទស្សន៍រដ្ឋចិន CCTV ដោយលោកបាននិយាយបន្ថែមថា ប្រទេសចិនមានឆន្ទៈក្នុងការធ្វើការជាមួយប្រទេសកាណាដា ដើម្បីពង្រឹងទំនាក់ទំនងឡើងវិញ។

ការិយាល័យរបស់ លោក Carney បាននិយាយថា លោក Carney និងលោក Xi បានពិភាក្សាគ្នាអំពីបញ្ហាពាណិជ្ជកម្ម រួមមានទាំងផលិតផលកសិកម្ម និងកសិ-ម្ហូបអាហារ ព្រមទាំងអាហារសមុទ្រ និងរថយន្តអគ្គិសនី។

លោក Xi ក៏បានជួបជាមួយនាយករដ្ឋមន្ត្រីថៃ លោក Anutin Charnvirakul ដោយនិយាយថា ប្រទេសចិននឹងចែករំលែកបទពិសោធន៍អភិវឌ្ឍន៍របស់ខ្លួន និងអំពាវនាវឱ្យមានវឌ្ឍនភាពយ៉ាងឆាប់រហ័សលើខ្សែរថភ្លើងរវាងប្រទេសទាំងពីរ និងបង្កើនកិច្ចខិតខំប្រឹងប្រែងដើម្បីបង្ក្រាបឧក្រិដ្ឋកម្មឆ្លងដែន។