ប្រធានាធិបតីចិន លោក Xi Jinping នឹងបិទបញ្ចប់ដំណើរទស្សនកិច្ច ៣ថ្ងៃរបស់លោក នៅកូរ៉េខាងត្បូង នៅថ្ងៃសៅរ៍ (១ វិច្ឆិកា) នេះ ជាមួយនឹងអាហារពេលល្ងាច និងកិច្ចប្រជុំកំពូលកម្រិតប្រមុខរដ្ឋ រៀបចំដោយប្រធានាធិបតីកូរ៉េខាងត្បូង Lee Jae Myung ដែលជាសម្ព័ន្ធមិត្តរបស់អាមេរិក ទើបជាប់ឆ្នោតថ្មី។

ហានិភ័យគឺខ្ពស់ខ្លាំងណាស់សម្រាប់លោក Lee ដែលចូលកាន់តំណែងកាលពីខែមិថុនាកន្លងទៅ ខណៈលោកសន្យាថាធ្វើឱ្យមានតុល្យភាពទំនាក់ទំនងរវាងទីក្រុងសេអ៊ូល ជាមួយទីក្រុងប៉េកាំង។ លោក Lee ជួបបញ្ហាប្រឈមជាច្រើន រួមទាំងការការពារសេដ្ឋកិច្ច ដែលជំរុញការនាំចេញរបស់កូរ៉េខាងត្បូង និងកាត់បន្ថយភាពតានតឹងជាមួយកូរ៉េខាងជើង ស្របពេលការប្រកួតប្រជែងកើនឡើងរវាងចិន និងអាមេរិក។

កាលពីដើមសប្តាហ៍នេះ លោក Lee ក៏បានធ្វើជាម្ចាស់ផ្ទះទទួលលោកប្រធានាធិបតីអាមេរិក Donald Trump សម្រាប់រទស្សនកិច្ចផ្លូវរដ្ឋយ៉ាងប្រញាប់ប្រញាល់ ជាមួយនឹងអំណោយ និងការលើកសរសើរយ៉ាងក្រៃលែង មុនពេលប្រកាសកិច្ចព្រមព្រៀងពាណិជ្ជកម្មដ៏គួរឱ្យភ្ញាក់ផ្អើលមួយ។ ក្នុងជំហានបង្ហាញពីតុល្យភាពទំនាក់ទំនង លោក Lee ក៏គ្រោងនឹងរៀបចំព្រឹត្តិការណ៍ស្រដៀងគ្នានេះសម្រាប់លោក Xi នៅថ្ងៃសៅរ៍នេះ ខាងក្រៅវេទិកាកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅទីក្រុង Gyeongju រួមទាំងកិច្ចប្រជុំកំពូល និងអាហារពេលល្ងាចថ្នាក់រដ្ឋផងដែរ។ នេះជាដំណើរទស្សនកិច្ចលើកដំបូងរបស់លោក Xi ទៅកាន់កូរ៉េខាងត្បូង ក្នុងរយៈពេល ១១ឆ្នាំ។

ទីក្រុងសេអ៊ូល គឺជាសម្ព័ន្ធមិត្តយោធាដ៏សំខាន់របស់អាមេរិក ដែលមានបន្ទាយដាក់កងទ័ពអាមេរិករាប់ពាន់នាក់ និងពឹងផ្អែកលើឆ័ត្រនុយក្លេអ៊ែររបស់អាមេរិក សម្រាប់ជួយរារាំងកូរ៉េខាងជើង ដែលមានអាវុធនុយក្លេអ៊ែរ។ ប៉ុន្តែសេដ្ឋកិច្ចរបស់កូរ៉េខាងត្បូង គឺជាប់ពាក់ព័ន្ធយ៉ាងខ្លាំងមិនត្រឹមតែសហរដ្ឋអាមេរិកប៉ុណ្ណោះទេ ប៉ុន្តែក៏មានប្រទេសចិនផងដែរ៕