យោធារបស់ប្រទេសចិន បាននិយាយនៅថ្ងៃសៅរ៍ (១ វិច្ឆិកា) នេះថា ខ្លួនបានត្រួតពិនិត្យ និងតាមដានប្រតិបត្តិការល្បាតរួមមួយ ដែលរៀបចំឡើងដោយហ្វីលីពីន នៅក្នុងដែនទឹកសមុទ្រចិនខាងត្បូងដែលមានជម្លោះ កាលពីថ្ងៃទី៣០ ខែតុលា និងថ្ងៃទី៣១ ខែតុលា។

ទីក្រុងវ៉ាស៊ីនតោន និងទីក្រុងម៉ានីល បានបង្កើនកិច្ចសហប្រតិបត្តិការយោធា ដោយកាលពីថ្ងៃសុក្រកន្លងទៅនោះ បានបើកបង្ហាញផែនការបង្កើតក្រុមការងាររួមថ្មីមួយសម្រាប់តំបន់នានា រួមទាំងសមុទ្រចិនខាងត្បូង ដែលជាបណ្តាញដឹកជញ្ជូនពាណិជ្ជកម្មប្រចាំឆ្នាំជាង ៣សែនកោដិដុល្លារ។

លោក Tian Junli អ្នកនាំពាក្យបញ្ជាការភាគខាងត្បូងនៃកងទ័ពរំដោះប្រជាជនចិន បាននិយាយថា ការល្បាតរបស់ហ្វីលីពីន រួមជាមួយដៃគូដែលមិនបញ្ចេញឈ្មោះ "បានធ្វើឱ្យខូចសន្តិភាព និងស្ថិរភាពក្នុងតំបន់យ៉ាងធ្ងន់ធ្ងរ"។ លោកបានហៅហ្វីលីពីន ថាជា "អ្នកបង្កបញ្ហា" ក្នុងតំបន់។

គួរឱ្យដឹងថា កាលពីថ្ងៃ៣០ និង ៣១ ខែតុលា កងកម្លាំងប្រដាប់អាវុធនៃប្រទេសអូស្ត្រាលី នូវែលហ្សេឡង់ ហ្វីលីពីន និងសហរដ្ឋអាមេរិក បានធ្វើសមយុទ្ធនៅសមុទ្រចិនខាងត្បូង។ កងនាវាចរទី៧ របស់សហរដ្ឋអាមេរិក បាននិយាយថា សមយុទ្ធនេះមានគោលបំណងបង្ហាញ "ការប្តេជ្ញាចិត្តរួម ក្នុងការពង្រឹងកិច្ចសហប្រតិបត្តិការក្នុងតំបន់ និងអន្តរជាតិ ដើម្បីគាំទ្រដល់ឥណ្ឌូប៉ាស៊ីហ្វិកសេរី និងបើកចំហ"៕