អាស៊ាន បានជំរុញឱ្យមហាអំណាចពិភពលោក ប្រើប្រាស់ឥទ្ធិពលរបស់ពួកគេដោយភាពទទួលខុសត្រូវ ស្របតាមច្បាប់អន្តរជាតិ និងលើកកម្ពស់សន្តិភាព ជាពិសេសក្នុងចំណោមជម្លោះសកល និងតំបន់ ដែលកំពុងបន្ត ខណៈមេដឹកនាំបានប្រមូលផ្តុំគ្នានៅទីក្រុងគូឡាឡាំពួរ នៅថ្ងៃសៅរ៍ (១ វិច្ឆិកា) នេះ សម្រាប់កិច្ចប្រជុំថ្នាក់រដ្ឋមន្ត្រីការពារជាតិអាស៊ាន លើកទី១២ (ADMM-Plus) ។

ក្នុងសុន្ទរកថាបើកកិច្ចប្រជុំ លោករដ្ឋមន្ត្រីក្រសួងការពារជាតិម៉ាឡេស៊ី Mohamed Khaled Nordin បានសង្កត់ធ្ងន់ថា ប្រទេសទាំងអស់ ដោយមិនគិតពីទំហំ ឬឥទ្ធិពលនោះទេ ត្រូវតែឈរយ៉ាងរឹងមាំបំផុតប្រឆាំងនឹងការរំលោភច្បាប់អន្តរជាតិ និងគោលការណ៍មនុស្សធម៌។

លោកលើកឡើងថា "រឿងមួយដែលគ្រប់គ្នាត្រូវតែគាំទ្រ នោះគឺច្បាប់អន្តរជាតិ។ គ្រប់ប្រទេសទាំងអស់ ទាំងធំទាំងតូច ត្រូវតែឈរយ៉ាងរឹងមាំប្រឆាំងនឹងការរំលោភច្បាប់អន្តរជាតិ និងមនុស្សជាតិ"។ ជំនួប ADMM-Plus ត្រូវបានគេរំពឹងថានឹងផ្តោតលើសន្តិសុខដែនសមុទ្រ ជំនួយមនុស្សធម៌ ការប្រឆាំងភេរវកម្ម និងកិច្ចសហប្រតិបត្តិការការពារជាតិនៅឥណ្ឌូប៉ាស៊ីហ្វិក។

កិច្ចប្រជុំសន្តិសុខក្នុងតំបន់នេះ បានប្រមូលផ្តុំសមាជិកអាស៊ានទាំង១១ និងដៃគូសន្ទនាចំនួន៨ រួមមាន អាមេរិក ចិន ជប៉ុន កូរ៉េខាងត្បូង ឥណ្ឌា អូស្ត្រាលី នូវែលសេឡង់ និងរុស្ស៊ី ដើម្បីពិភាក្សាពីកិច្ចសហប្រតិបត្តិការលើវិស័យការពារជាតិ និងស្ថិរភាពក្នុងតំបន់។ រដ្ឋមន្ត្រីការពារជាតិអាមេរិក លោក Pete Hegseth និងរដ្ឋមន្ត្រីការពារជាតិចិន លោក Dong Jun ក៏ស្ថិតក្នុងចំណោមអ្នកចូលរួមជំនួបនេះដែរ៕