អង្គការសហប្រជាជាតិ (UN) និងដៃគូមនុស្សធម៌របស់ខ្លួន បានប្រមូលជំនួយលើសពី ២៤.០០០តោន ពីច្រកឆ្លងកាត់តំបន់ហ្កាហ្សាស្ទ្រីប ចាប់តាំងពីបទឈប់បាញ់ចូលជាធរមាននៅថ្ងៃទី១០ ខែតុលា មក នេះបើតាមការលើកឡើងរបស់អ្នកនាំពាក្យអង្គការសហប្រជាជាតិ កាលពីថ្ងៃសុក្រ (៣១ តុលា) ដោយដកស្រង់ពីយន្តការលេខ ២៧២០ របស់ UN។

លោក Stephane Dujarric អ្នកនាំពាក្យរបស់អគ្គលេខាធិការ UN បានបន្តថា លើសពីនេះ មានការថយចុះគួរឱ្យកត់សម្គាល់ក្នុងការស្ទាក់ចាប់ ឬការលួចជំនួយ ដែលប្រមូលបានដោយអង្គការសហប្រជាជាតិ និងដៃគូរបស់ខ្លួនពីច្រកហ្កាហ្សា ដោយបន្ថែមថា វាងថ្ងៃទី១០ ដល់ថ្ងៃទី២៨ ខែតុលា មានតែ ៥% ប៉ុណ្ណោះនៃគ្រឿងផ្គត់ផ្គង់ដែលប្រមូលបាន ត្រូវរាយការណ៍ថាមានគេស្ទាក់ផ្លូវ និងលួចទៅបាត់ បើធៀបនឹងប្រហែល ៨០% នៅចន្លោះថ្ងៃទី១៩ ខែឧសភា ដល់ថ្ងៃទី៩ ខែតុលា។

លោក Dujarric និយាយទៀតថា ទោះបីជាមានស្ថានភាពវិជ្ជមានទាំងនេះក៏ដោយ ក៏ប្រព័ន្ធសុខាភិបាលរបស់ហ្កាហ្សា នៅតែបន្តប្រឈមមុខនឹងបញ្ហាសំខាន់ៗក្នុងការដោះស្រាយតម្រូវការដ៏ធំធេងរបស់អ្នកស្រុក ហើយគិតត្រឹមគិតត្រឹមថ្ងៃទី៧ ខែតុលា ឆ្នាំ២០២៥នេះ បុគ្គលិកសុខាភិបាលជាង ១.៧០០នាក់ ត្រូវបានសម្លាប់ ចាប់តាំងពីសង្គ្រាមចាប់ផ្តើមមក នេះបើយោងតាមអាជ្ញាធរសុខាភិបាលហ្កាហ្សា៕