ទីបំផុតព្យុះសង្ឃរា Melissa ដ៏មានឥទ្ធិពល កំពុងចាកចេញពីតំបន់ការ៉ាអ៊ីបហើយនៅថ្ងៃសុក្រ (៣១ តុលា) បន្ទាប់ពីបានវាយលុកសហគមន៍ក្នុងប្រទេសហ្សាម៉ាអ៊ីក ហៃទី និងគុយបា អស់ជាច្រើនថ្ងៃ ដោយបន្សល់ទុកនូវការបំផ្លិចបំផ្លាញទូលំទូលាយ ដែលសម្លាប់មនុស្សយ៉ាងតិច ៥០នាក់ ហើយអាជ្ញាធរបារម្ភថាតួលេខនេះនឹងកើនឡើងថែមទៀត។

ខ្យល់ព្យុះនេះបានបោកបក់ចូលហ្សាម៉ាអ៊ីក ជាមួយនឹងកម្លាំងដ៏ធំសម្បើមកាលពីថ្ងៃអង្គារកន្លងទៅ ក្នុងព្យុះប្រភេទទី៥ ហើយអ្នកស្រុកកំពុងវាយតម្លៃការខាតបង់ និងផ្លូវដ៏វែងឆ្ងាយក្នុងការស្តារឡើងវិញ។

អាជ្ញាធរនិយាយថា ផ្នែកជាង ៦០% នៃហ្សាម៉ាអ៊ីក នៅតែគ្មានថាមពលអគ្គិសនីប្រើប្រាស់ ហើយជិតពាក់កណ្តាលនៃប្រព័ន្ធទឹកមិនដំណើរការនោះទេ ខណៈអ្នកស្លាប់ឈរនៅតួលេខ ១៩នាក់។ ក្នុងទីក្រុងមាត់សមុទ្រប្រវត្តិសាស្ត្រ Black River នៅភាគនិរតីហ្សាម៉ាអ៊ីក សំណង់រហូតដល់ ៩០%បានខូចខាតដំបូល ខណៈព្យុះក៏បានបំបាក់បណ្ដាញខ្សែភ្លើង និងបំផ្លាញរចនាសម្ព័ន្ធបេតុងអស់ជាច្រើន។

នៅប្រទេសហៃទីក្បែរនោះ អាជ្ញាធររាយការណ៍ថា មនុស្សយ៉ាងតិច ៣១នាក់ បានស្លាប់ និងជាង ២០នាក់ ផ្សេងទៀតបាត់ខ្លួន ដែលភាគច្រើនក្នុងតំបន់ភាគខាងត្បូង ហើយមនុស្សជាង ១៥.៨០០នាក់ កំពុងស្ថិតក្នុងជម្រកបណ្ដោះអាសន្ន។ 

នៅគុយបា ពុំមានការស្លាប់ណាមួយត្រូវរាយការណ៍ទេ គិតត្រឹមថ្ងៃសុក្រដដែលនោះ ខណៈទីភ្នាក់ងារការពារស៊ីវិល បានជម្លៀសមនុស្សជាង ៧៣៥.០០០នាក់ នៅទូទាំងភាគខាងកើតនៃប្រទេសកោះនេះ ហើយទឹកជំនន់ដ៏គ្រោះថ្នាក់បានបន្តក្នុងតំបន់មួយចំនួន។ គុយបាកំពុងបន្តជួយសង្គ្រោះអ្នកស្រុកដែលនៅតែជាប់គាំងដោយទឹកជំនន់ដ៏ធំ ពីឥទ្ធិពលនៃព្យុះ Melissa ដ៏កំណាចនេះ៕