កូរ៉េខាងជើង បាននិយាយនៅថ្ងៃសៅរ៍ (១ វិច្ឆិកា) នេះថា ការរំសាយអាវុធនុយក្លេអ៊ែរនៅឧបទ្វីបកូរ៉េ ដែលកូរ៉េខាងត្បូង លើកយកទៅពិភាក្សាក្នុងកិច្ចប្រជុំកំពូលជាមួយចិន នៅថ្ងៃសៅរ៍នេះ គឺជា "ការស្រមើលស្រមៃ" ដែលមិនអាចសម្រេចបានទេ នេះបើយោងតាមប្រព័ន្ធផ្សព្វផ្សាយរដ្ឋ KCNA ។

ប្រធានាធិបតីចិន លោក Xi Jinping និងប្រធានាធិបតីកូរ៉េខាងត្បូង លោក Lee Jae Myung បានបើកកិច្ចប្រជុំកំពូលមួយនៅថ្ងៃសៅរ៍នេះ ខាងក្រៅវេទិកាកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក APEC។ ការិយាល័យលោក Lee បាននិយាយកាលពីថ្ងៃសុក្រថា លោក Xi និងលោក Lee នឹងពិភាក្សាគ្នាពីការរំសាយអាវុធនុយក្លេអ៊ែរនៅឧបទ្វីបកូរ៉េ។

ក្រោយមក KCNA បានចេញសេក្ដីរាយការណ៍ថា៖ “កូរ៉េខាងត្បូង នៅតែមិនទាន់ភ្ញាក់ខ្លួនទៀតថា ការបន្តរឹងរូសបដិសេធគោលជំហររបស់កូរ៉េខាងជើង ក្នុងឋានៈជារដ្ឋអាវុធនុយក្លេអ៊ែរ និងការនិយាយពីសុបិនទាំងថ្ងៃរបស់ខ្លួនក្នុងការសម្រេចបានរឿងរំសាយអាវុធនុយក្លេអ៊ែរ គឺគ្រាន់តែបង្ហាញពីភាពខ្វះខាតនៃសុភវិនិច្ឆ័យតែប៉ុណ្ណោះ”។

ដោយដកស្រង់សេចក្តីថ្លែងការណ៍របស់អនុរដ្ឋមន្ត្រីការបរទេសកូរ៉េខាងជើង លោក Pak Myong Ho ប្រព័ន្ធផ្សព្វផ្សាយ KCNA សង្កត់ធ្ងន់ថា ទីក្រុងព្យុងយ៉ាង នឹងបង្ហាញដោយការអត់ធ្មត់ថា ការរំសាយអាវុធនុយក្លេអ៊ែរគឺជា "ការស្រមើលស្រមៃ" ដែលនឹងគ្មានថ្ងៃអាចក្លាយជាការពិតបានទេ៕