អគ្គរដ្ឋលេខាធិការអង្គការសហប្រជាជាតិ(UN)លោក Antonio Guterres បានគាំទ្រការរិះគន់របស់ប្រធានសិទិ្ធមនុស្ស UN លើការវាយប្រហាររបស់សហរដ្ឋអាមេរិកនៅសមុទ្រការ៉ាអ៊ីប និងមហាសមុទ្រប៉ាស៊ីហ្វិក ។

គួរឲ្យដឹងថា អ្នកស្រី Ravina Shamdasani គឺជាអ្នកនាំពាក្យក្រុមសិទ្ធិមនុស្ស UN និយាយថា ការវាយប្រហាររបស់សហរដ្ឋអាមេរិកលើទូកសង្ស័យថាជួញដូរគ្រឿងញៀន ហើយនិងការបាត់បង់អាយុជីវិតមនុស្ស មិនអាចទទួលយកបាននោះទេ ។

អ្នកស្រីបន្តថា សហរដ្ឋអាមេរិក ត្រូវតែបញ្ឈប់ការវាយប្រហារបែបនេះ ហើយនិងចាត់វិធានការចាំបាច់ ដើម្បីការពារការសម្លាប់ក្រៅប្រព័ន្ធតុលាការនៅលើទូកទាំងនេះ មិនថាអ្វីដែលក្រុមឧក្រិដ្ឋករប្រឆាំងជាមួយពួកគេឡើយ ។

អ្នកស្រីនិយាយទៀតថា ការវាយប្រហារតាមច្រកអាកាសរបស់សហរដ្ឋអាមេរិកលើទូកនៅសមុទ្រការ៉ាអ៊ីប និងសមុទ្រប៉ាស៊ីហ្វិក បានបំពានច្បាប់សិទ្ធិមនុស្សអន្តរជាតិ ។ មនុស្ស ៦១នាក់ ត្រូវបានគេរាយការន៍ថា ត្រូវបានសម្លាប់នៅក្នុងការវាយប្រហារជាបន្តបន្ទាប់ ធ្វើឡើងដោយកងកម្លាំងប្រដាប់អាវុធសហរដ្ឋអាមេរិកលើទូកក្នុងតំបន់ការ៉ាអ៊ីប និងសមុទ្រប៉ាស៊ីហ្វិក ចាប់តាំងពីដើមខែកញ្ញារហូតមក ។

ខណៈពេលនោះដែរ ការិយាល័យសិទ្ធិមនុស្ស UN បាននិយាយផងដែរថា ពួកគេទទួលបានសេចក្តីរាយការណ៍ថា មនុស្សយ៉ាងហោច ១០នាក់ ត្រូវបានសម្លាប់ដោយកងកម្លាំងសន្តិសុខ អំឡុងបាតុកម្ម បន្ទាប់ពីការបោះឆ្នោតសកលកាលពីដើមសប្តាហ៍នេះ នៅប្រទេសតង់ហ្សានី ៕